雖然北京當局早排打「經濟牌」，開口呼籲國民盡量咪去日本旅行，試圖借此反擊日本首相高市早苗提出嘅「台灣有事論」，不過最新數據顯示呢招完全唔湊效。日本國土交通大臣金子恭之周二公佈，雖然舊年 12 月中國赴日遊客人數按年急插近半，但日本同月整體遊客人數卻創下 360 萬人次嘅新高。喺日圓持續疲軟同國際航線增加嘅帶動下，日本官方預計2025年全年訪客人數將達 4,270 萬人次，首次突破 4,000 萬大關，旅遊消費總額更估計高達 9.5 萬億日圓，兩樣都創下歷史新高。

高市早苗喺舊年 11 月 7 號喺國會發表有關「台灣有事」嘅言論後，引發中方強烈不滿。北京隨即採取連串反制措施，除咗煞停恢復日本水產進口嘅安排及大幅取消中日航班外，更發出旅遊警示，提醒公民避免去日本。受此影響，金子恭之喺記者會上證實，舊年 12 月嚟自中國嘅遊客數量大幅回落至 33 萬人，較前一年同期大減約 45%，係自 2022年 1 月以嚟首次出現咁明顯嘅跌幅。路透社數據顯示，舊年前 11 個月，中國遊客一直係日本最大嘅客源，佔總數約四分之一，但喺「限日令」發酵下，上個月中國遊客喺整體訪日人數中嘅佔比已跌至不足一成。

不過，少咗中國「豪客」並無阻礙日本旅遊業嘅強勁復甦。日媒分析指，受惠於日圓貶值以及來往其他國家同地區嘅航線班次增加，嚟自歐美及亞洲其他地區嘅遊客填補咗空缺。日本政府估算，2025年嘅全年訪客人數將遠超 2024年嘅 3,687 萬人次，創下歷來最高紀錄。

外界原本估計北京意圖透過打擊旅遊業嚟削弱高市早苗嘅國內支持度，但結果似乎適得其反。據日本新聞網本月初公佈嘅民意調查顯示，高市內閣嘅支持率不跌反升，較上月上揚 2.3 個百分點，高達 78.1%，人氣維持高企。喺強大嘅民意基礎下，高市早苗周一正式宣佈，將於 1 月 23 號解散眾議院，並定於 2 月 8 號舉行大選。呢次將係繼 2024年 10 月後，日本喺短時間內再度舉行眾議院選舉，顯示高市對選情充滿信心。

中日關係因地緣政治議題陷入冰點，雙方喺經濟領域嘅角力亦日趨白熱化。雖然中國遊客數量銳減，但日本旅遊業憑藉多元化嘅客源策略成功抵銷咗衝擊。金子恭之強調，隨著遊客住宿同購物等消費總額創新高，日本觀光立國嘅目標並無受地緣政治因素動搖。