倫敦消息，英國工黨政府預料將會喺周二公佈中國喺倫敦起「超級大使館」嘅審批結果，外界盛傳當局可能會開綠燈，以此作為首相施紀賢月底前首次訪華嘅「見面禮」。為此，在英港人聯同多個關注人權組織及當地居民，喺周六（17號）喺倫敦皇家鑄幣廠舊址發起大型集會，主辦方稱有約 2,500 人參與。多個政黨代表到場聲援，包括保守黨黨魁栢丹娜及改革黨國會議員克魯格，呼籲政府否決申請。

集會喺周六下晝 2 點舉行，現場大批示威者舉起反對標語，亦有寫上「釋放黎智英」及其他香港政治犯名字嘅橫額。人群中旗幟飄揚，除咗「光時」旗、英國國旗外，亦見到西藏雪山獅子旗及東突厥斯坦伊斯蘭共和國國旗等。倫敦警方喺場部署大量警力，喺鑄幣廠附近架設鐵馬劃出示威區，嚴防有人堵塞馬路。期間曾經有一名外籍親中人士試圖搞事，隨即被警方趕走。

保守黨黨魁栢丹娜首次出席港人集會，佢發言時獲在場人士歡呼。曾經喺尼日利亞生活嘅佢表示，自己都係喺獨裁政權統治下長大，深明噤若寒蟬嘅感受。佢批評中國制裁英國國會議員、協助俄羅斯等行徑，但現屆工黨政府面對北京時卻表現軟弱、畏縮及「無腰骨」，形容批准興建超級大使館係錯誤做法。佢強調英國需要一個以本國利益為先嘅政府，並承諾會繼續捍衛自由。

自由民主黨國會議員迪恩則形容施紀賢月底嘅訪華行程係攞住個「乞兒兜」去北京，指超級大使館計劃係對英國決心嘅考驗，質疑政府會唔會為經濟利益犧牲國家安全。佢呼籲施紀賢應拒絕有關申請，並喺黎智英獲釋前取消訪華。保守黨前黨魁施志安亦有發言，暗諷政界有人逃避表態，並以英國上世紀三、四十年代嘅歷史為鑑，提醒切勿重犯未能及時認清極權本質嘅錯誤，否則將背叛因相信英國價值而移英嘅港人。

改革黨國會議員克魯格亦係首次出席呢類集會，佢批評中國係史上最惡劣政權之一，指英國過去對中國喺新疆及其他地區嘅行為視而不見，只係為咗貪圖資金，令英國產業受損。佢強調改革黨若果上台，將致力重振英國工業，讓國民認清中國真面目。

集會期間發生一段插曲，示威者響應海外香港藝術家發起嘅「自由之光」行動，試圖將要求釋放黎智英嘅標語及訴求投影到皇家鑄幣廠外牆。不過負責行動嘅藝術家張嘉莉表示，警方嚴厲阻止有關行動，起初甚至禁止投影喺示威者自製嘅紙皮上，並警告會沒收器材。經交涉後，警方雖容許投影喺紙皮，但只要有一點光線投射到建築物上，便立即上前干預。

參與集會嘅除咗政界人士，仲有不少基層市民。89 歲嘅孫婆婆已經係第四次參與反對建館示威，佢直言抗議「唔係一次就得」，批評施紀賢驚咗中共。專程從曼城搭 5 個鐘巴士到倫敦嘅前支聯會常委徐漢光則表示，呢個係佢第八次參與示威，佢形容擬建嘅超級大使館將係「賊窩」及間諜基地，即使身在海外，港人亦須大力反對。一名不願具名嘅當地居民亦向傳媒表示，中國人權紀錄惡劣，政府若容許建館簡直係「骯髒」嘅決定。