屯門市廣場周四晚發生警員開槍案，一個越南籍男子揸住把刀喺商場出面徘徊，仲試圖襲擊途人同挾持一名女子，最終畀趕到嘅衝鋒隊警員連開兩槍擊斃。呢次係香港警方自舊年逐步更換中國製手槍以嚟，第一次喺實戰行動中開槍。

事發喺周四夜晚 7 點幾，嗰名 34 歲、著白衫兼孭黑色背囊嘅男子，手持一把牛肉刀喺屯門屯順街及屯匯街一帶遊蕩。大批揸住盾牌同戴防暴頭盔嘅衝鋒隊警員接報趕到現場，同佢對峙。從現場流出嘅閉路電視同目擊者片段見到，現場氣氛極度緊張，個男人無理會警方警告，反而揮舞利刀，突然轉身衝向屯門市廣場地下一間日式食肆外嘅人群。當時正值晚市繁忙時段，途人見狀爭相走避，場面混亂，更有男子抱住BB驚惶逃生。

混亂期間，兩名女子走避唔切跌倒地上，持刀男子隨即衝前，扯住其中一名著灰衫女子嘅手袋，更一度抓住佢條頸並揮舞利刀，企圖挾持對方。千鈞一髮之際，在場兩名持有佩槍及一名持胡椒水發射器嘅警員果斷採取行動，幾乎同時向疑兇開火。消息指，警員共開兩槍，分別擊中疑兇心口同膊頭位置。疑兇中槍後隨即倒地，一度仍有意識並喺地上掙扎，警員見狀立即衝前踢走佢身旁嘅利刀，其中一名開槍警員隨即為疑兇進行急救，另一同袍則繼續擎槍戒備。

疑兇隨後陷入昏迷，由救護車送往屯門醫院搶救，惟最終延至夜晚 8 點 47 分證實傷重不治。據了解，兩名開槍警員使用嘅係警方舊年起逐步引入、用嚟取代美製左輪嘅中國製曲尺手槍，今次亦係新槍落地後首宗開槍案件。

警方事後封鎖現場調查，並喺疑兇身上檢獲一支伸縮警棍，以及一袋重約 1 公斤嘅懷疑冰毒。據悉，涉案疑兇係越南籍，持有香港身份證。有途人透露，早喺案發前約兩個鐘，已經喺大興邨街市對開的士站目擊該名男子，當時已覺佢神情有異，行徑古怪。

至於涉案牛肉刀嘅來源，亦隨住超市閉路電視片段曝光而查明。片段顯示案發前約 7 點 08 分，即槍擊案發生前約半個鐘，疑兇曾闖入屯門市廣場內嘅驚安之殿堂超市。當時佢鬼鬼祟祟咁從後門潛入超市內一處賣燒番薯同關東煮嘅小食檔廚房，趁一名男職員開緊水喉洗用具嗰陣，如入無人之境咁闖入，並當個職員無到，喺廚房內隨手掠走一把牛肉刀後施然離開。職員驚覺把刀畀人偷咗後曾大聲追問，但疑兇木口木面，未有理會並迅速走人，職員隨即報警求助。涉事小食檔事後暫停營業，由警員拉起封鎖線搜證。