新一屆立法會今日舉行任期內首場會議，焦點除咗集中喺早前發生嘅大埔宏福苑奪命大火災後支援工作之外，最矚目嘅莫過於行政長官李家超打破立法會成立 28 年嚟嘅慣例，破天荒喺議員任期開始嘅首次大會上向全體議員發言。李家超喺會上猶如「導師」上身，向在座議員「教路」，強調要貫徹「行政主導」及「愛國者治港」原則，確保行政立法良性互動。立法會主席李慧琼喺開場發言嗰陣，對特首開創性咁出席會議表示感謝，並承諾全體議員將會喺支持行政主導原則下勤力履職，成為特首最堅實可靠嘅改革拍檔。

李家超喺會上向議員提出議政「貼士」，語氣儼如循循善誘，寄語議員喺分析問題時要把握好全局與局部、宏觀與微觀等關係，反映民意時唔好「隨波逐流」，應發揮治理者影響力，主動為市民過濾錯誤信息。佢強調樂意聽取意見，但也特別「點醒」議員，希望佢哋喺政府做得啱嘅時候，能夠「公道說出」。現場所見，特首呢番前所未見嘅「訓示」似乎相當收效，唔少議員發言時即刻「執口水尾」，引用特首提及嘅「打破利益藩籬」等字眼；選委界管浩鳴亦特別感謝特首承諾對大火徹查到底。

喺會議其餘時間，多名議員對政府處理宏福苑大火嘅表現給予高度評價，身體力行回應特首「公道說出」嘅期望。選委界議員何君堯直言欣賞政府喺災後嘅果斷行動；工聯會陳穎欣就讚揚公務員、紀律部隊同關愛隊日夜奔走、盡忠職守。漁農界何俊賢嘅發言更加激動，反問大眾：「自問有冇一個人如果你自己去做政府的話，係咪好得過佢哋？」並指如果無法做得更好，就應該予以理解同包容。選委界林筱魯更將今次救援同美國洛杉磯大火做比較，形容香港反應迅速，「做得唔錯」。

喺具體安置方案方面，財政司副司長黃偉綸喺會上解釋，若果揀原址重建宏福苑，因為涉及業權收購等複雜程序，隨時要搞成 10 年；相比之下，將同區「頌雅路西」熟地改建做居屋嘅方案更加可行。呢個觀點獲得多名議員認同，民建聯陳克勤指出，「頌雅路西」用地已經有社區設施配套，呼籲大家「去行一行就知」，形容呢個係目前嘅「最好方案」。

針對重建資金問題，當局透露賑災基金目前餘款大約 30 億元，但粗略估算收購業權需要高達 60 億元。金融界議員陳振英建議，扣除預計可收回嘅約 10 億元保險賠償及繼續接收捐款外，剩低約 20 億元缺口若果由公帑「埋單」，平均每位納稅人只需分攤約 1,000 元，認為方案值得考慮。選委界簡慧敏則建議提供特殊稅務優惠，鼓勵商界同市民慷慨解囊。

除咗討論政策，會上亦充滿對祖國施援嘅感激之情。身兼 G19 召集人嘅陳振英感謝內地企業同胞無私捐助；霍啟剛則引用國家主席習近平嘅關心，並分享四川一個 95 歲婆婆話「人哋幫過我哋，而家到我哋幫人」嘅故事，形容體現咗「血濃於水、人間有愛」。工聯會吳秋北列舉數據指出，包括廣東、福建、河南、甘肅等多省市總工會及中國企業等，已經合共捐出約 1,580 萬元善款。整場會議在特首「教路」及議員「呼應」下，充分展現了本屆議會行政主導的新常態。