美國總統特朗普琴日針對伊朗局勢祭出重磅經濟制裁，簽署行政命令宣佈即日起，對所有同伊朗維持貿易往來嘅國家一律加徵 25% 關稅，並強硬表明呢個係「最終裁定，不得更改」。此舉被視為直接劍指伊朗嘅最大貿易拍檔——中國。市場分析指，隨著中伊貿易關係被納入美方制裁範圍，中國輸往美國嘅相關商品恐面臨高額關稅，勢必進一步加劇中美貿易摩擦，並波及汽車及能源等多條產業鏈。

數據顯示，中國長期以嚟係伊朗石油嘅最大買家及最主要貿易夥伴。單計2025年頭 11 個月，中伊雙邊貿易總額已達 90.9 億美元，其中中國對伊朗出口額為 62.3 億美元，主要涉及機械設備、汽車及零件、鋼鐵製品及光學醫療設備；進口額則為 28.6 億美元，主要係原油及石油製品，多數運去山東一帶嘅獨立煉油廠。換言之，中國對伊朗錄得超過 33 億美元嘅貿易順差。特朗普今次將貿易戰火引向伊朗嘅合作夥伴，令北京當局面臨新嘅經濟壓力。

與此同時，伊朗國內嘅人道危機正急劇惡化，甚至演變成「屠殺級」鎮壓。據外電報道及目擊者流出嘅片段顯示，伊朗當局自上周四起全面切斷互聯網及手機通訊，甚至干擾「星鏈」衛星訊號，喺「資訊黑洞」下對反政府示威者展開血腥清場。消息指，伊朗伊斯蘭革命衛隊直接喺貨車上架設軍用機關槍，向街上面嘅人群進行無差別掃射。雖然德黑蘭當局辯稱被殺示威者都係「受僱於美國同以色列嘅恐怖份子」，但外界估計實際死亡人數可能已經飆升到 6,000 人。

首都德黑蘭市內情況慘烈，多間醫院爆煲。有當地醫生向《時代》雜誌透露，單日確認嘅死亡個案已超過 217 宗，傷者大多係頭部或眼部中彈，顯示部隊蓄意採取致命武力。由於死難者眾多，屍袋唔單止塞爆咗殮房，甚至被迫堆放喺卡里扎克法醫中心嘅露天停車場。

面對局勢瀕臨失控，美國駐伊朗虛擬大使館琴日已發出緊急安全警示，強烈呼籲身處當地嘅美國公民即刻撤離。特朗普早喺周日已發出警告，指美方可能需要喺美伊會面前採取行動，隨即喺琴日落實該項關稅行政命令。