中國河南省新蔡縣發生一宗校園離奇命案，一名讀緊「今是清華園中學」中一嘅 13 歲朱姓男學生，上周三喺校內猝死。官方喺周日發布最新調查結果，定調死因係「心源性疾病」，並強調排除刑事案件同中毒可能。針對家長及公眾強烈質疑死者左胸出現「釘咁大個窿」嘅傷口，當局解釋話嗰個傷口其實係法醫抽血做毒化檢驗嗰陣留低嘅針孔，而死者嘴角殘留嘅紅色液體，就係法醫翻動遺體時流出嘅體液。不過，官方講法未能完全平息民憤，部分民眾對此仍然好懷疑。

呢單案搞到當地社會軒然大波，連日嚟大批民眾同學生家長聚集喺涉事學校門口聲援死者家屬，要求校方交代真相，人潮一度令現場水洩不通。當地公安部門隨即派出大批警力到場維持秩序及進行圍堵，警民對峙氣氛緊張。直至上周六入夜後人群先逐漸散去，但學校周邊仍然泊滿警車同有警員巡邏戒備。網上輿論對男童死因眾說紛紜，甚至有網民將佢左胸傷口同「活體器官移植」傳聞聯想埋一齊，質疑案件背後另有內情。

事發經過疑點重重。據家屬透露，朱姓學生直至 7 號狀況依然正常，但喺 8 號清晨 5 至 6 點左右，校方突然打畀家長話個仔「唔得啦」。當家屬趕到學校嗰陣，發現校方正試圖將載住遺體嘅救護車駛走，甚至打算運去外地醫院。家長即刻喺校門口攔截救護車，雙方發生對峙。令人 R 爆頭嘅係，喺家長仲未見到個仔最後一面嗰陣，轉去宿舍睇竟然發現個仔嘅私人物品已經被清理一空，間房被打掃到「一塵不染」。當家屬要求翻查事發時嘅閉路電視片段，校方卻以「設備故障」為由拒絕提供，而且無畀任何具體解釋。

直到事發幾個鐘後，死者父母先喺警方陪同下喺醫院太平間見到阿仔遺體。家長赫然發現，個仔除咗嘴角有血跡外，左胸口更有一個清晰可見、好似畀釘吉穿嘅傷口，條腰亦出現大片紫黑色瘀青。家屬影低遺體相片並放上網，隨即引發廣泛關注。

面對公眾強烈質疑，新蔡縣教育局先喺 9 號通報已初步排除刑事案件，話做緊善後工作，但因未有詳細交代死因，服唔到眾。隨後新蔡縣官方以「聯合調查組」名義喺 11 號再度通報，指經法醫檢驗後，死者全身無外傷，排除生前受外力傷害，毒物檢測亦呈陰性，最終判定為突發心源性疾病致死。雖然官方試圖透過技術性解釋嚟澄清「針孔」及屍斑等疑點，但因為校方喺事發初期嘅處理手法，包括急於運走遺體、清理宿舍及閉路電視「剛好」壞咗等連串巧合，令外界對官方結論仍抱有保留態度。