大埔宏福苑早前發生造成 161 人死亡嘅世紀大火，事發至今個半月，仲未有任何政府官員需要就事件問責。行政長官李家超喺舊年 12 月宣布成立「獨立委員會」檢討事件，消息指委員會將會喺今年 3 月中正式展開聆訊。委員會主席、法官陸啟康已經喺周二委任資深大律師杜淦堃等 5 人做委員會代表大律師，並由羅文錦律師樓擔任代表律師，將會集中火力調查大火起因同屋苑維修工程涉及嘅「圍標」疑雲。

據悉，由於今次慘劇牽涉層面極廣，涉及大量文件同證詞，目前仲未定實調查要搞幾耐。委員會早前啟用嘅官方網頁顯示，除咗資深大律師杜淦堃之外，仲包括大律師李澍桓、俞匡庭、李俊軒及馮天榮。負責協助調查嘅羅文錦律師樓，以前喺 2012 年南丫海難及 2015 年公屋食水含鉛事件嘅獨立調查委員會入面，都曾經幫手處理大量證據文件及調查工作，被指對相關程序好有經驗。

有報道引述消息人士透露，委員會嘅調查將會鎖定兩大核心方向：首先係搞清楚大火起因，並向政府相關部門同機構提出改善建議，以提升整體安全及應變水平；其次係深入跟進宏福苑點解會出現「圍標」情況。調查範圍將會涵蓋多個政府部門及機構，包括屋宇署、消防處、市區重建局及民政及青年事務局；涉事嘅物業管理公司、顧問公司及維修承辦商亦喺調查名單之列。此外，警方、廉政公署及競爭事務委員會到時亦會派員出席聆訊及作供。

雖然政府強調委員會目的係「釐清事實、總結經驗」，但外界對佢嘅職權範圍仍然有擔心。該委員會由原訟庭法官陸啟康出任主席，成員包括行政會議成員陳健波及港鐵董事局前主席歐陽伯權。輿論早前質疑，該委員會並唔係根據《調查委員會條例》成立，即係無傳召證人等法定調查權力，擔心最終調查能否查出真相，以及喺處理責任問題嗰陣，會唔會對需要問責嘅官員或部門出現「避重就輕」嘅情況。

對於呢場導致百幾人喪生嘅嚴重災難，公眾關注焦點一直都係官員問責及工程監管漏洞。隨著法律團隊就位及聆訊日期擬定，調查工作即將進入實質階段，到時各涉事部門及機構喺聆訊中嘅供詞，預料將會成為公眾檢視呢場悲劇成因嘅關鍵。