美國當局喺周二喺北大西洋採取行動，扣押一艘懸掛俄羅斯國旗、被指同委內瑞拉有關聯嘅油輪。英國國防部隨後罕有承認，英軍應美方要求，為今次扣押行動提供咗一系列軍事支援。事件隨即引發外交風波，俄羅斯交通部同日發表聲明，嚴厲批評美方舉動嚴重違反國際法，強調公海航行自由不容侵犯，並要求美方確保船員安全。

涉事油輪原名叫「貝拉1」，後尾改名做「馬林內拉」。據外電報道，嗰隻船早前計劃去委內瑞拉裝載石油，但喺過去兩個幾禮拜以嚟，受制於美國對委內瑞拉嘅制裁及封鎖措施，油輪一直未能成功靠岸，最終喺未有載油嘅狀態下駛走。有報道引述美方官員消息指，該船船員曾經喺 2025年 12月拒絕美方提出嘅登船檢查要求，美國海岸防衛隊隨即展開追截，雙方由加勒比海一帶追逐至大西洋水域。期間，俄羅斯方面據報曾派出一艘潛艇及其他海軍力量為該油輪護航，雙方喺海上對峙氣氛緊張。

對於英軍介入行動，英國國防部喺聲明中證實，為配合美方嘅執法行動，英方提供咗預先計劃嘅作戰支援，當中包括派遣一艘皇家海軍軍艦提供海上支援，以及出動空軍戰機進行空中監視。英國國防大臣賀理安形容涉事船隻「劣跡斑斑」，指佢涉及協助俄羅斯及伊朗走法律罅避開國際制裁。英方強調，今次行動係英國同歐美盟友喺全球打擊違反制裁行為努力嘅一部份，所提供嘅援助完全符合國際法規範。

俄方透露，美國海軍人員最終喺冰島附近水域強行登上「馬林內拉」號，隨後俄方同船隻失去聯絡。俄羅斯媒體早前喺社交網站發布相片，畫面顯示相信係美方人員喺海上企圖強行登船嘅情況。針對船上人員嘅安危，俄羅斯塔斯社引述俄外交部消息指，俄方已正式向美國提出要求，必須確保船上嘅俄羅斯人員能得到符合人道及體面嘅待遇，並儘快安排佢哋回國。

針對美英嘅聯合行動，俄羅斯交通部發聲明予以強烈譴責。聲明引用1982年《聯合國海洋法公約》指出，「航行自由適用於公海」，任何國家都無權對喺其他國家管轄範圍內正式註冊嘅船舶單方面使用武力。俄方重申，美方此舉公然違反國際海洋法準則，侵犯咗俄羅斯作為船旗國嘅管轄權。目前該油輪嘅去向及船員嘅具體狀況仍不明朗。