華府近日表示，已經促成委內瑞拉將原本出口畀中國嘅石油，改為供應畀美國。美國廣播公司引述消息指，特朗普政府要求委內瑞拉嘅代理當局切斷同中國、俄羅斯、伊朗同埋古巴嘅經濟往來，仲規定石油生產同出口淨係可以同美國合作。北京隨即作出回應，批評美方做法係「霸凌行徑」。

喺星期三嘅外交部例行記者會上面，彭博社記者問起呢單新聞，中國外交部發言人毛寧回應話，委內瑞拉係主權國家，對自己嘅自然資源同經濟活動享有永久主權，美國借「美國優先」個名去干預人哋點處置石油資源，係嚴重違反國際法，侵犯委內瑞拉主權同人民權利，中方對此予以強烈譴責。

路透社引述數據指出，中國喺2025年每日大約進口38.9萬桶委內瑞拉原油，佔中國海運原油進口大約4%。有貿易商話，喺相關供應受限嘅情況下，中國可能會進一步轉向伊朗同俄羅斯入貨。

另一方面，美方行動亦引發俄羅斯反應。路透社報道，美國曾經試圖扣押一艘掛住俄羅斯國旗、同委內瑞拉有關嘅油輪，雙方喺大西洋一帶對峙咗差唔多兩個禮拜，之後有俄羅斯潛艇同其他艦隻出現喺附近海域。俄羅斯官媒RT播出畫面，顯示直升機喺「馬里內拉」號油輪上空盤旋，指美軍疑似想強行登船。美國海岸警衛隊之後亦喺南美洲東北海岸附近，截停另一艘同委內瑞拉相關嘅滿載油輪。

中國長期視委內瑞拉為拉丁美洲嘅重要夥伴，並一直想擴大喺區內嘅影響力。舊年5月，國家主席習近平喺俄羅斯出席二戰勝利80周年紀念活動期間，同委內瑞拉總統馬杜羅見面，形容中委關係係「鐵桿友誼」同「全天候戰略夥伴」，重申支持委內瑞拉維護國家主權。

美軍行動前幾個鐘，馬杜羅曾經喺加拉加斯接見中國政府拉美及加勒比地區特使邱小琪帶領嘅代表團，傾雙邊合作同美方威脅。德國「法蘭克福匯報」引述消息指，中方對美軍突然殺出嚟感到意外。馬杜羅之後喺社交平台發文，話中委友誼經得起時間考驗。

美軍上個禮拜尾喺加拉加斯發動突襲，拘捕馬杜羅。委內瑞拉軍方公布有23個士兵陣亡，古巴就指有32名軍人同情報人員死亡，美方就話無人傷亡。中國、俄羅斯等盟友都譴責美方行動。路透社指出，呢次係自1989年美國出兵巴拿馬以嚟，喺拉美規模最大嘅軍事干預。

部分美國盟友對事件反應低調，呼籲對話同遵守法律。德國政府發言人柯爾內柳斯表示，美國未能夠喺聯合國安理會充分證明行動符合國際法。馬杜羅之後喺紐約聯邦法院就販毒等指控拒絕認罪。美方指控佢涉及毒品走私、貪腐同暴力罪行。多年嚟，西方同人權組織一直批評馬杜羅實行專制統治，委內瑞拉喺2024年具爭議嘅選舉後，曾經爆發大規模抗議。