美軍早排對委內瑞拉發動突襲，空襲當地機場等重要設施並成功生擒總統馬杜羅，令全世界嚇一跳。不過，喺軍事行動曝光之前，美國國防部五角大樓附近嘅薄餅店客流量已經有跡可尋。就喺外界以為局勢稍為靜落嚟之際，追蹤相關數據嘅平台發現，五角大樓周邊嘅薄餅訂單再次出現異常爆升，升幅甚至超越攻打委內瑞拉前夕，令外界揣測美軍係咪部署緊新一輪重大軍事行動。

呢個被稱為「五角大樓薄餅指數」嘅現象，雖然唔係官方統計，亦從未獲軍方承認為正式情報工具，但已經成為流傳幾十年嘅「民間情報」。其核心邏輯相當直接：當美國國防及情報中樞附近嘅薄餅外賣量喺深宵時分突然勁升，往往意味住高層官員及軍事人員正為應對重大國際危機而通宵加班。呢種現象最早被稱為「Pizza Meter」，後來被社交媒體及開源情報圈統稱為「薄餅指數」，視作觀察華盛頓動向嘅另類窗口。

專門追蹤呢個數據嘅知名社交平台 X 帳號「Pentagon Pizza Watch」喺 5 日出 post 指出，距離五角大樓約 2.3 英里嘅 Papa John’s 薄餅店，其客流量喺美軍突襲委內瑞拉前夕曾經暴增 770%；不過，喺行動結束後嘅呢幾日，同一間舖頭嘅客流量竟然進一步飆升到 1250%。與此同時，另一間距離五角大樓僅 1 英里嘅 District Pizza Palace 亦錄得客流量增加 313%。薄餅店生意仲好過攻打委內瑞拉之前，引發輿論熱烈討論，質疑這係咪意味住美軍仲有後續部署，甚至有更大規模嘅行動即將發生。

睇返歷史，類似情況並唔係第一次出現。早喺冷戰時期，已經有傳聞指蘇聯特工透過追蹤華盛頓特區嘅「薄餅外送加班情況」，嚟研判美國政府嘅內部動向。1990年 8 月伊拉克入侵科威特前夕，達美樂薄餅嘅特許經營商便發現美國中央情報局辦公大樓嘅薄餅訂單大幅增加；隨後嘅 1991年波斯灣戰爭期間，亦觀察到類似現象。美國有線電視新聞網資深記者布利策曾指出，若深夜時分仍有大量食物送去五角大樓，往往係「大鑊嘢發生」嘅指標。

對於外界透過外賣訂單估計軍事動向，美國國防部從未正面承認其情報價值。國防部長赫格塞斯早前接受訪問嗰陣更半開玩笑咁話，自己可能會特登喺某個夜晚大量落單，「就係要等大家搞唔清狀況」，並笑言：「嗰陣可能只係我用某個 App 隨手亂嗌。」雖然呢番說話試圖淡化指數嘅嚴肅性，但也間接證實咗國防部高層知悉外界正密切注視著佢哋嘅「宵夜習慣」。目前，隨著薄餅店深夜繁忙狀態再現，全球目光再次聚焦華盛頓，關注呢項另類指標會唔會再次準確預示另一場風暴嘅來臨。