大埔宏福苑五級大火造成嚴重傷亡，慘劇發生到而家成個幾月，善後工作又起波瀾。民政及青年事務局早前宣布，引用《建築物管理條例》向土地審裁處申請解散屋苑現屆法團管理委員會，並委任第三方物管公司接管。此舉即刻惹嚟反彈，「全港業主反貪腐反圍標大聯盟」發言人趙恩來質疑，當局做法好似廢咗管委會「武功」咁，最令人擔心嘅係災民可能因此失去集體追討賠償嘅法定權力，日後追究責任恐怕只能以個人身份單打獨鬥。

針對外界質疑，民政及青年事務局局長麥美娟早前解釋，政府係按法例第31條介入，委任華懋集團旗下嘅合安管理有限公司做臨時管理人。佢強調業主立案法團仍然存在，管理人只係取代管委會職能，唔會影響法團嘅法定權力。對於坊間憂慮第三方接手可能會「放生」某啲應負責任嘅人，麥美娟重申調查工作一直做緊，強調任何人、部門或機構若需負責，當局定必追究到底。

不過，趙恩來反駁指解散現任管委會再委任第三方嘅做法前所未有。佢透露，過去幾日接觸多名宏福苑業主，發現資訊極其混亂，唔少業主竟然係睇電視新聞先知切身權益被改動，批評當局缺乏溝通同透明度，未有諮詢業主就擅作決定，畀人「大石砸死蟹」嘅感覺。佢質疑政府未有清楚解釋現任管委會點解無法履行職能，「其實大家都唔知新管理人職能去到邊，政府要解釋點解現任做唔到，而新委任嘅就做得到」。

趙恩來進一步分析，新安排嘅客觀效果係令管委會無法行使法定權力。佢解釋，若果冇管委會，業主就無辦法透過業主大會授權去代表全體追討賠償同損失。佢以十幾年前天頌苑短樁案做例子，指若只能由個別業主入稟，需獨力承擔高昂法律風險，「打輸官司就要全數承擔」。喺宏福苑一案入面，近2,000個家庭痛失家園，若最終失去集體談判權，邊個能替死傷者討回公道成疑。

對於政府話新管理人可以依法攞到法團合約、銀行戶口及保單內容等資料以提供專業意見，趙恩來認為相關講法牽強。佢指出，大火相關嘅關鍵檔案及文件早就畀執法部門沒收，即使係新管理人亦難以攞到，「所以你話委任新管理人可以更專業咁處理後續，呢個講法有啲牽強」。佢更擔心新管理人由政府委任，決策難免受官方方向影響，能否獨立於政府為業主追究責任屬未知之數。

趙恩來形容，當局做法喺某程度上係將管委會「廢武功」，剝奪其處理日常運作及涉及大額撥款嘅權力，令業主喺操作上完全「無say」。目前坊間流傳當局或喺委任新管理人後，重新組織由舊成員組成嘅管委會，惟消息未獲證實。趙認為，若當局覺得現屆管委會失效，應先畀佢哋知悉並表態係咪「舉手投降」，而唔係喺毫無諮詢下直接由第三方介入，令本已為安置奔波嘅災民，喺追討權益嘅路上倍感徬徨。