大埔宏福苑五級大火發生就嚟一個月，災後安置工作卻爆出爭議。負責營運過渡性房屋「善樓」嘅香港善導會，早前向入住災民表明，搬走嗰陣唔可以帶走由商界及公眾捐贈嘅雪櫃、洗衣機等傢俬電器，有關規定喺社交平台曝光後惹嚟輿論狠批。面對公眾壓力，善導會前晚發文「轉軚」，改口話住戶可以按需要帶走物資，不過單嘢已經引發連串風波。

一直協助災民嘅義工 Benson Tsang 向傳媒透露，善導會嘅決定並唔係一時興起，而係早有部署。佢指出，早喺上個禮拜已經有住戶反映，職員曾經逐家逐戶上門，有系統咁將屋內每一件電器貼上編號貼紙，例如喺電視機貼上寫有房號及「TV-01」嘅標籤。Benson 質疑咁做明顯係為咗建立詳細物資清單，以防災民攞走電器，批評機構心態好似「防賊」咁，即使而家「跪低」更改安排，佢哋嘅機構形象已經係「覆水難收」。

善導會總幹事李淑慧22日朝早喺電台節目為事件「解畫」，強調機構無意將傢電據為己有。佢解釋，初時向唔同機構及基金申請物資為 160 個「清水樓」單位配置「十寶」傢電，原意係希望現有住戶搬出後，下一戶入住嘅災民仍有基本配套。佢承認喺了解公眾疑慮及體察災民搬遷後仍可能「一無所有」嘅情況下，已更新安排，容許災民按需要帶走物資，剩返嘅物資就會考慮捐贈畀其他有需要家庭。

不過，呢場「公關災難」已經令公眾對慈善機構嘅信任受損。Benson 直言，涉事單位本屬冇傢電嘅「清水房」，商業機構捐出物資嘅原意係應付災民燃眉之急，並唔係捐畀善導會作為資產。若果禁止住戶帶走，變相令善導會擁有該批物資。佢更指出，現時每戶災民都有「一戶一社工」跟進，若災民冇得帶走電器，離營後要重新張羅，而新搬入嘅災民可能已由社工協助籌得物資，這將造成嚴重嘅資源重疊浪費。

事件亦引發外界對非牟利機構管治嘅關注。翻查善導會財務報表，機構年度收入約 2 億元，但 17 名高層薪酬總開支逾 2,000 萬元，佔全年收入一成；其中最高薪嘅一名高層年薪達 220 萬元，其餘 16 人平均年薪亦達 100 萬元。Benson 慨歎，市民捐款期望能幫到有需要人士，而唔係「肥咗高層」，喺大災難當前，機構高層若未能發揮應有作用，反而同前線實況脫節、對災民斤斤計較，只會令人感到悲哀。

Benson 又透露，據佢了解，唔准帶走物資並非善導會獨有政策，其他營運過渡房屋嘅機構亦有類似規定，只係未爆發爭議。佢形容現時前線社工為受助者四處搵物資已經「爆晒煲」，機構決策層缺乏同理心，令本身已流離失所、屈居百呎房間嘅災民，喺搬遷時仲要面對討價還價嘅折騰，情況令人心酸。