壹傳媒創辦人黎智英涉及嘅「港區國安法」案件，上個禮拜被高等法院裁定「串謀勾結外國勢力」及「串謀發布煽動刊物」等罪名成立。判決引發國際社會強烈反響，多個民主國家、國際機構同人權組織紛紛表態聲援黎智英。面對外部壓力，中國外交部駐港公署連日嚟採取高調反擊，並主動約見多國駐港外交代表提出嚴正交涉。

根據外交部駐港公署網頁公佈，針對西方國家官方同政客就黎智英案定罪裁決發表嘅言論，公署喺上周三同周四，先後約見咗美國及英國等「有關國家和組織」嘅駐港機構負責人。喺會面入面，中方代表表達咗強烈不滿同堅決反對，批評相關言論干涉香港事務及中國內政，並敦促有關國家、組織及政客必須遵守國際法同國際關係基本準則，尊重中國主權同香港法治，停止一切干預行為。

翻查紀錄，自黎智英案宣判以嚟，外交部駐港公署展開咗密集嘅輿論攻勢。喺短短 8 日內，公署因應判決已經發佈咗多達 8 篇聲明或公佈。早喺案件判決當日，公署已率先發出題為「正義審判不容置疑，外部干預註定失敗」嘅聲明，措辭強硬咁敦促「有關國家和政客認清現實、懸崖勒馬」。同一日，公署仲特登整咗一份題為「致駐港外媒的一封信：關於黎智英案的事實與真相」嘅案件「懶人包」，試圖向外國傳媒解說官方立場及案件理據。

除咗官方層面嘅嚴正交涉，外交部駐港公署特派員崔建春亦親自「出手」加入筆戰。佢喺具中資背景嘅英文報章「南華早報」上面，發表題為「關於黎智英案你應該知道這些」嘅署名文章。嗰篇文章內容同公署早前向駐港外媒發佈嘅「懶人包」大致雷同，重申案件經過公開審訊，證據確鑿，旨在反駁國際社會對審訊不公嘅指控，力撐判決合理。

雖然中方多次發聲，西方國家及媒體嘅聲援行動並冇停過。針對「華爾街日報」及「華盛頓郵報」刊登批評判決嘅社論，公署喺上周二連發兩封信件逐一駁斥。之後，七國集團同歐盟外長發表聯合聲明要求北京釋放黎智英，再次觸動中方神經，公署隨即再發聲明表示強烈不滿。公署其後亦特別發出公佈，指上述兩家美國主流報章已經刊登咗公署駁斥相關社論嘅聲明內容，以示中方立場已傳達至國際輿論場。呢場圍繞黎智英案嘅外交與輿論角力，隨住判決落定而愈演愈烈。