據外電引述知情人士爆料，美國正部署向俄羅斯施加更大壓力，想藉此推動俄烏停火談判。消息指，如果俄羅斯總統普京拒絕同烏克蘭達成和平協議，華府正準備對俄國能源領域實施新一輪制裁，相關措施最早可能喺本周內公佈。受消息刺激，布蘭特期油價格周三曾短暫急升70美仙，高見每桶60.33美元，之後升幅有啲回落。

知情人士指出，美方考慮緊多種制裁選項，矛頭直指負責協助俄羅斯出口原油嘅「幽靈船隊」油輪，以及協助購買俄國原油嘅中間商。白宮就發聲明回應，指各政府機構嘅職責係為總統制定可執行方案，強調總統特朗普目前仲未就制裁問題作出任何新決定。不過，知情人士提返，最終話事權仲係喺特朗普手度。事實上，自2022年俄烏戰爭爆發以來，針對大型石油公司及貿易嘅制裁，已經令俄羅斯原油價格跌到開戰以來嘅低位，進一步加劇當地經濟壓力。

美國財長貝森特本周初曾經同幾位歐洲大使見面商討相關計劃，會後佢喺社交平台X發文重申：「特朗普總統係和平總統，喺佢領導下，美國將繼續把結束烏克蘭戰爭作為首要任務。」對於美方醞釀新制裁，克里姆林宮發言人佩斯科夫周三同記者講，留意到有美國官員考慮緊有關措施，直言「任何制裁明顯都會損害重建關係嘅進程」。

喺制裁陰霾下，外交斡旋亦都同步進行緊。美國特使維特科夫早排喺柏林，同烏克蘭總統澤連斯基及歐洲多國領袖就最新和平提議進行咗兩日嘅會談。美、烏及歐洲官員都對一系列由美方支持、旨在確保基輔戰後安全嘅保證措施取得重大進展表示歡迎。不過，雙方喺關鍵議題上仲有好大分歧，特別係烏克蘭東部地區嘅未來地位、俄羅斯央行被凍結資產嘅用途，以及扎波羅熱核電站嘅管理權等問題。

據悉，俄方要求烏克蘭割讓頓巴斯地區部分領土，包括頓涅茨克同盧甘斯克；普京嘅軍隊自2014年以來多次試圖完全佔領該區都唔成功。針對未被佔領嘅地區，美國提出嘅方案建議將其轉變為「非軍事區」或「自由經濟區」，並實行特別管理。而家仲未清楚喺該方案下，呢啲土地會唔會喺事實上被承認為俄羅斯領土，亦唔知莫斯科肯作咩讓步。基輔同佢盟友對於從國防戰略重地撤軍及割讓領土嘅前景感到猶豫，基輔方面更要求若果俄羅斯再次入侵，盟友需以書面形式明確列出具體應對行動。