社交媒體巨頭 Meta 捲入大醜聞，外媒引述內部洩露文件踢爆，公司長期對來自中國嘅廣告商「隻眼開隻眼閉」，任由佢哋喺旗下平台（包括 Facebook、Instagram 同 WhatsApp）狂推詐騙、非法賭博同色情等違規廣告。文件顯示，單係2024年，Meta 喺中國市場嘅廣告收入高達 180 億美元，當中竟然有成 30 億美元、即係約 19% 嘅收入係嚟自呢啲違規廣告。為咗保住呢筆巨額收益，Meta 高層甚至不惜解散專責打擊中國詐騙廣告嘅團隊，搞到平台上面嘅欺詐內容死灰復燃。

呢份內部文件詳細披露咗 Meta 同中國廣告代理商之間嘅「灰色產業鏈」。Meta 喺中國嘅生意極度依賴 11 間「頂級代理商」搵客，呢啲代理再將戶口分租畀二、三級代理，變成一個複雜嘅中間商網絡。呢種層層轉租嘅模式為騙徒提供咗天然屏障，有廣告優化專家專門鑽研 Meta 嘅審核漏洞，幫詐騙集團避過封鎖；部分代理商仲公然標榜可以提供「降低 80% 被封號風險」嘅服務。

更離譜嘅係，Meta 設有「白名單」機制，容許頂級代理商嘅廣告就算被系統標記做違規，都可以入「二次人工審核」，期間廣告照樣出街，幫騙徒爭取咗寶貴嘅行騙時間。有記者實測發現，只需俾等值 30 美元嘅加密貨幣，就可以透過二級代理開戶口兼成功投放高回報投資詐騙廣告，唔少涉事代理商仲要係 Meta 官方認證嘅合作夥伴。

面對龐大嘅違規收益，Meta 內部嘅取態備受爭議。文件顯示，公司喺 2024 年上半年曾成立一支專責團隊，透過收緊審核標準，成功將中國違規廣告比例由 19% 大幅壓低至 9%。點知，呢項整頓行動卻引起咗 Meta 行政總裁朱克伯格嘅關注。據報朱克伯格喺2024年底介入，要求團隊「暫停工作」，理由係要「加倍努力打擊全球欺詐」，但實際上就解除咗針對中國代理商嘅新增審核限制。

隨後該反欺詐團隊被解散，短短半年內，違規廣告比例即刻反彈返去 16%。Meta 發言人安迪·斯通回應嗰陣死撐話個團隊本身屬「臨時性質」，不過內部文件坦言，公司選擇咗「永久容忍」中國廣告商嘅高違規率，目標只係維持全球危害比例，而唔係對所有市場一視同仁。

呢啲違規廣告嘅受害者遍布全球，由此引發嘅罪案更加係觸目驚心。文件列舉咗多宗案例，包括台灣消費者誤購假冒保健品、美加投資者被呃曬畢生積蓄，甚至有詐騙集團利用 WhatsApp 群組誘騙用戶投資虛假股票，單一案件涉款金額就高達 2.14 億美元。美國伊利諾伊州檢方已於2025年3月起訴多名涉嫌利用 Meta 平台行騙嘅台灣及馬來西亞人。儘管 Meta 前產品管理高級總監都承認咁高嘅違規比例「難以辯護」，但面對員工質疑點解唔懲罰違規嘅大客嗰陣，高層嘅回應直言係「收入影響太大」。

其實，自2009年 Facebook 被中國封鎖後，Meta 一直試圖重返中國市場都唔成功，目前佢嘅中國廣告收入主要靠 Shein、Temu 等跨境電商，但亦夾雜大量針對海外用戶嘅詐騙廣告。由於中國監管機構通常唔理針對境外嘅詐騙活動，令騙徒喺 Meta 平台如入無人之境。

雖然 Meta 內部曾於2025年5月嘅抽樣調查中發現，800 個中國帳戶一個月內投放咗 2,800 萬美元違規廣告，且大部份嚟自受保護嘅頂級代理商，但公司最終只係閂咗部分細戶口，並預計相關收入「好快會捲土重來」。目前美國參議員已呼籲證券交易委員會（SEC）及聯邦貿易委員會（FTC）介入調查，Meta 喺商業利益同平台安全之間嘅取捨，正令佢面臨前所未有嘅監管風暴。