中日爆發雷達鎖定風波後，局勢持續升溫，美國首度介入表態力挺盟友。美國國務院發言人周二批評中國解放軍戰機以雷達照射日本自衛隊戰機嘅行徑，不利於地區和平與穩定，並重申美日同盟前所未有咁牢固，美方對日本嘅防衛承諾堅定不移。日本官房長官木原稔對美方立場表示歡迎。面對盟友支持，日本首相高市早苗周三透露，正爭取盡早同美國總統特朗普舉行日美首腦峯會，唔排除親自訪美或喺第三國會晤，向中國展示美日團結；佢亦已經向G7領袖通報事件以爭取支持。

這宗被喻為中日近年最嚴重嘅軍事對峙事件發生於上周六。日本防衛省指，中國航母「遼寧號」嘅艦載殲-15戰機，喺沖繩東南公海上空連續兩次對日本航空自衛隊F-15戰機實施火控雷達照射，分別喺距離約50公里及一百多公里外進行，兩次均可能處於導彈射程內。台灣有軍事評論分析，基於日方以「火控雷達鎖定」形容，相信這並非個別機師魯莽行為，而係一場經過精密計算嘅「交戰規則（ROE）」壓力測試。日媒指出，這是防衛省首次公佈中國軍機向自衛隊飛機照射雷達，過往僅發生過艦艇照射事件。

喺中日因雷達風波爭持不下之際，中俄軍方周二晚展開聯合行動。日本防衛省偵測到兩架俄羅斯Tu-95戰略轟炸機從日本海飛往東海，與兩架中國轟-6轟炸機會合後，喺太平洋進行長距離聯合飛行。日本防衛相小泉進次郎周三喺社交平台批評，這是針對日本嘅武力展示，對國家安全構成重大威脅。中國國防部發言人張曉剛則回應指，這是年度計劃內嘅合作項目，旨在展示共同維護地區穩定嘅能力。

就雷達照射事件，雙方亦喺「事前通報」問題上隔空駁火。中方官媒央視旗下帳號引述獨家消息指，解放軍事前已向附近海域日艦通報，日方亦透過無線電確認收到。小泉進次郎周二最初表示不知情，至翌日改口承認中方確曾就艦載機升降訓練作通報，但批評內容資訊不足，未有包括具體地點及訓練規模。中國外交部發言人郭嘉昆則反擊指日方「蓄意滋擾在先，造謠炒作在後」，係鬧劇嘅肇事方，並暗批美國唔好被日方誤導。

台灣總統賴清德周三亦加入譴責行列，批評中方行徑非常不當，呼籲中國體現大國責任。佢強調台灣堅定反對任何以暴力或脅迫改變區域和平穩定嘅單邊行為，將提升國防力量並與民主國家共同維護現狀。