中國海關總署尋日公布最新外貿數據，今年頭11個月嘅進出口表現呈現「出口強、進口弱」嘅態勢。數據顯示，中國進出口總值去到5.75萬億美元，按年增長2.9%。其中，出口總值係3.41萬億美元，按年升5.4%；進口就錄得2.34萬億美元，按年跌0.6%。喺進出口此消彼長之下，今年頭11個月嘅貿易順差累計已經去到1.07萬億美元，再創歷史新高。

針對中國咁龐大嘅貿易順差，《紐約時報》發表報道分析指，呢樣嘢同人民幣匯率持續偏低兼且走勢疲弱有直接關係，形容人民幣目前嘅弱勢已經嚴重偏離經濟基本面，更成為當前「全球經濟最顯著嘅扭曲現象」。報道引述部分中國經濟學家估計，若果跟返國際標準衡量，人民幣匯率被低估嘅幅度可能高達三分之一，這導致中國物價同其他國家比起上嚟顯得特別平，出現好大差異。

目前人民幣兌美元匯率大約係7.1水平。做過中國人民銀行調查統計司司長、而家喺上海中歐國際工商學院教書嘅盛松成，11月底喺一場金融會議上就匯率問題發表睇法。佢直言，若果按照「購買力平價」計，美元兌人民幣匯率「就唔係1比7喇，好可能係1比5、1比4」。盛松成更引述數據指，有人計過，若果完全反映購買力平價，匯率甚至應該係「1美元兌3.5蚊人民幣」。

報道進一步分析人民幣弱勢嘅成因，指出呢個係由中國經濟增長放緩、低息環境同政府政策等多重因素共同造成。追溯返源頭，人民幣嘅跌勢始於2022年新冠疫情期間嘅上海封城。當時嘅嚴格封控措施搞到全國消費者信心急劇插水，而且到而家都未完全恢復。信心危機令到好多中國家庭同企業拋售人民幣，轉去買美金，或者投資海外磚頭、礦場同企業資產，呢種避險情緒亦連帶推高咗金價。

面對走資同信心不足，中國人民銀行自上海封城初期起，採取咗容許人民幣大幅貶值嘅策略，並喺之後三年基本維持喺呢個低位水平。雖然匯率問題被視為中國經濟最關鍵且敏感嘅議題之一，官方亦一直謹慎迴避關於「匯率被低估」嘅討論，但疲弱嘅匯率客觀上為中國出口帶嚟咗巨大優勢。報道指出，過去五年間，人民幣持續弱勢令中國商品極具價格競爭力，期間中國對歐盟嘅汽車出口量就驚人咁暴增咗16倍，而強勁嘅出口表現亦為國內工廠創造咗數以百萬計嘅就業機會。

不過，隨著貿易順差不斷擴大，市場亦關注匯率政策會唔會出現調整。另一名前中國人民銀行官員繆延亮上星期接受外媒訪問嗰陣就露口風，認為而家或者確實係「允許人民幣升值嘅窗口期」。