大埔宏福苑奪命火災發生後，本港大專院校嘅氣氛都變得好緊張，甚至引發校方採取強硬行動。浸會大學學生會喺周四晚突然收到校方通知，勒令佢哋即時停止運作，所有由學生會管理嘅設施包括會室同告示板將會由大學接管，仲要求學生會成員喺周六下晝五點前清走晒所有個人物品。學生會喺今日凌晨發聲明，對校方嘅決定表示強烈譴責，並逐點反駁校方指控，質疑背後涉及政治動機。

事源喺本周二，浸大學生會喺校內民主牆隔離嘅告示板貼大字報，內容寫住「沉痛哀悼宏福苑大火死者」、「We are Hongkongers」，以及「懇請政府從善如流，回應公眾需求，公義得到伸張」等字句。點知校方反應勁快，即刻派人用水馬同木板將嗰塊板圍封，仲貼上「臨時物料存放區」嘅字眼。隔咗兩日，校方行動升級，直接發信要求學生會停止運作。雖然校方封信冇明確指出行動同大字報有關，但學生會質疑兩者有直接關聯，形容當救災變成「維穩」，任何嘢都可能被扯上政治。

根據學生事務處發出嘅信，校方列出三大理由終止學生會運作：包括指浸大學生中淨係得少數係學生會會員、幹事會未能改善學生福利，以及未有遵守校方財務管理相關規定。對此，學生會聲明反駁指「校方提供嘅理據毫無事實基礎，純粹巧立名目」。喺會員人數方面，聲明指自四年前校方唔再代收會費之後，人數確係跌過，但經調低會費同積極招募，本年度會員人數已經比上學年多咗大約六倍；而且轄下仲有學術學會、宿生會等，可以廣泛反映意見。

針對財務同福利指控，學生會強調一直按校方指引處理財務，並已經同校方達成共識。相反，學生會指控係校方不斷削弱佢哋嘅服務能力，包括用「經營不善」做藉口接管兩間福利合作社、收返多個活動室，甚至用「文件問題」做理由，唔批學生會籌備緊嘅12月「千人宴」場地。學生會形容，早已向校方提交詳細福利計劃，好難理解校方咁急要暫停佢哋運作嘅原因。

學生會批評校方手段「反口覆舌、背信棄義」，唔單止否定幹事努力，更冇為同學權益著想。聲明直指「校方匆忙決定，令人好難唔懷疑背後係咪另有原因」，要求同校方直接對話。去到而家，浸大校方仲未有進一步回應事件。