中央駐港國安公署今晚（3日）發表語氣強硬嘅談話，嚴厲譴責有「一小撮外部敵對勢力」利用大埔宏福苑大火「借災生事」，企圖複製「修例風波」嘅手法擾亂香港。公署發言人警告，「法網恢恢，疏而不漏，反中亂港者，雖遠必誅」，強調隨著《香港國安法》及《維護國家安全條例》深入實施，任何觸碰法網嘅人，無論係匿喺國外定係藏身台灣，都必將受到法律嚴懲。

大火發生之後，本港社會出現唔同聲音，包括要求追究責任同獨立調查。被視為建制派嘅專欄作家屈穎妍尋日亦都撰文，以《先治好惹來蒼蠅的腐爛》為題，直指香港近年「一直用錯療傷方法」，政府架構只係重「政治表忠」同歌舞昇平，卻忽視民生小事，加上議員同傳媒「被綁手綁腳」失去監察作用，釀成大禍係遲早嘅事。佢更感嘆今次竟然要「用幾百條人命、幾千個家庭嚟交學費」。

不過，北京方面就將部分民間質疑定性為國安威脅。駐港國安公署發言人喺聲明入面宣稱，有境外敵對勢力扶植佢哋嘅香港代理人，「打著『為民請願』旗號」，實則喺暗處煽風點火、抹黑特區政府同救援人員，意圖重演「黑暴」亂象同再掀「顏色革命」。公署形容呢啲行為係「泯滅人性」，強調法例早已布下天羅地網，所有亂港言行都將被終生追究。

喺官方強硬表態嘅同時，警方國安處近日已經採取連串行動。發起「支援災民、獨立調查、審視監管、問責官員」四大訴求聯署嘅發起人之一關靖豐，早喺11月29日已經被捕；跟住前屯門區議員張錦雄同埋一名姓李嘅女義工亦都喺30日被拘。據了解，關靖豐同張錦雄已經喺12月1日獲准保釋。另外，民協主席廖成利等民間人士原定尋日下晝開記者會，就火災善後提出建議，點知主辦方喺會前突然通知傳媒，指因接獲「有部門」通知，記者會需要取消。消息指，廖成利等人喺事前曾經被國安處人員「約見」。

公署聲明最後重申，任何妄圖挑動民眾重拾抗爭記憶、製造亂港逆流嘅圖謀都係「癡心妄想」，官方絕不姑息手軟，必將「斬斷一切伸向香港嘅黑手」。呢一連串事件顯示，當局正嚴防大火引發嘅民怨轉化為政治危機。