立法會換屆選舉將會如期喺本月7號舉行，政務司司長陳國基聯同政制及內地事務局局長曾國衞尋日下晝見傳媒交代具體安排。陳國基強調，選舉工作同大埔宏福苑五級火災嘅善後工作係「雙軌並行」，兩者冇先後之分，選舉唔會因為救災拖慢，救災亦唔會影響選舉。佢指明白市民對火災感到悲痛同傷心，但重申香港好需要新一屆立法會喺出年1月1號履職，以處理修例同審批撥款等工作，咁先可以更有效協助災民，所以如期選舉而唔係延期先係最合適嘅做法。

受火災影響，曾國衞喺會上宣佈將重新安排大埔區內三個票站。原本設喺大埔浸信會公立學校、廣福社區會堂同大埔社區中心嘅三個票站，將會改設喺區內三間學校，受影響選民主要涉及宏福苑、廣福苑、大埔滘同大埔墟。當局到時會安排穿梭巴士方便選民去新票站。至於目前已經搬咗去其他區住嘅宏福苑受災居民，曾國衞指當局會透過「一戶一社工」機制，由社工主動通知居民有關新票站嘅安排，並會視乎佢哋嘅投票意願，安排合適嘅交通工具接送佢哋去票站投票。

就有關選舉宣傳活動嘅調整，陳國基表示，政府已決定取消原定喺12月6號搞嘅「選舉繽紛日」以及其他嘉年華、同樂日同晚會呢啲性質比較「歡樂」嘅活動。不過，當局會保留具資訊性同教育意義嘅活動，例如「選舉與我」巡迴展，以及漁護署、康文署等部門提供嘅設施免費入場同優惠。選民投完票之後，當局亦會繼續派發心意謝卡。另外，明、後兩日將會恢復舉辦八場功能界別選舉論壇，並會因應時局，喺論壇入面適當加入候選人對支援受災居民及災後處理意見嘅環節。

喺記者會嘅提問環節，氣氛一度好緊張。有傳媒質疑當局喺2020年曾以疫情為由引用《緊急法》押後選舉，質問今次堅持如期舉行，係咪認為火災嚴重性唔及疫情，定抑或選舉係用嚟「轉移視線，淡化災情」。陳國基回應話，只有如期選出議員先至審議到法案，係最佳安排。被問及喺現時社會氛圍下對投票率嘅評估，佢重申「從來無對投票率有預設目標」，只希望每名合資格選民能積極投票。

行政長官李家超昨早宣佈將就火災成立由法官主持嘅「獨立委員會」，而唔係過去處理嚴重事故（好似嘉利大廈大火、鉛水事件）嗰陣成立、有法定傳召權嘅「獨立調查委員會」，引起社會爭議。有記者喺會上追問陳國基，點解當局堅持唔成立獨立調查委員會，以及喺無法定權力下點樣確保涉事部門配合調查。不過新聞官未等陳國基回應就即刻介入擋駕，話「我諗我哋今日聚焦返立法會選舉嘅問題」。最終陳國基淨係答咗有關投票率嘅提問，對獨立委員會嘅質疑一句都冇講。成個見傳媒活動只係搞咗大約十五分鐘，兩名官員喺回應三個記者嘅提問後就即刻閃人離場。