大埔宏福苑喺周三早上爆發五級大火，火勢一度失控，燒咗差唔多 29 個鐘先完全撲熄。消防處截至 27 日晚上 10 點公布最新傷亡數字，事件造成 75 人死亡、77 人受傷，其中一名殉職者係消防員，另外仲有 11 名消防員喺救火時受傷，相信死傷人數會進一步上升。

晚上 9 點幾，救援人員喺大廈內抬出一名失去知覺嘅災民，佢頸上掛住一塊寫有「DEAD」嘅黑色牌，場面令人心酸。至於宏道閣 16 樓梯間，消防喺黃昏約 6 點 45 分成功救出一名男子，係極少數仍然生還嘅被困者。

大火消息震撼全港，附近居民晚上一批批走到臨時庇護中心，希望搵返失聯親人。有媽媽得知自己個嬰兒喺火海中遇難，即場情緒崩潰；有人徹夜喺現場附近守候，希望等到最後一線消息。災民陸續被安排入住唔同嘅社區會堂、體育館，有人直言政府提供嘅臨時單位最多只能住一兩星期，根本應付唔到漫長嘅善後，希望可以盡快獲安排簡約公屋暫住。亦有人索性喺廣福商場「打地舖」過夜，避開庇護中心嘅擠迫環境。

同一時間，社交平台上亦有唔少批評聲音，指大埔關愛隊直到早上先到場，隊員到場後只顧影相打卡，仲對義工指指點點，影響現場秩序，影完相轉頭就離開，引起大批網民不滿。

火災爆發後，外界再次關注宏福苑維修工程嘅管理問題。本報曾指出管理處內嘅火警警報系統長期被人關掉，懷疑係為咗方便工人用消防通道進出，避免觸發警鐘。接受明報訪問嘅前保安主管黃先生表示，佢喺在職期間至少兩至三次向上級反映系統唔應該關閉，但情況完全無改善。佢又指唔少住戶投訴見到工人喺竹棚吸煙，甚至喺窗台撿到煙頭，違規情況相當嚴重。佢形容做法「難以接受」，最終選擇離職。

事發時宏福苑外牆正進行大型維修工程，大廈外圍由棚架同密目式安全立網包住。其實喺去年 9 月，已經有居民向勞工處投訴棚網物料嘅阻燃能力，但當時處方嘅回覆惹嚟爭議。勞工處其後澄清，職員當時有檢視工程所用棚網嘅產品質量證書，顯示其阻燃效能符合《竹棚守則》嘅認可標準。處方又解釋，去年 10 月回覆查詢人所講「火災風險相對為低」，只係指工程唔涉及外牆熱工序，唔代表火警風險可以忽視，亦強調已提醒承建商加強地盤防火。

勞工處表示，自去年 7 月起已多次巡查宏福苑工程，至今合共巡查 16 次，最近一次係今個月 20 日，即火災前六日。巡查包括檢查棚架棚網嘅證書、提醒承建商採取防火措施，並曾就高處工作安全向承建商發出 6 張敦促改善通知書及提出 3 宗檢控。

不過，大量網上片段顯示，大火當晚棚網喺高溫下幾乎無阻燃作用，反而好似助燃物咁，令火勢迅速沿大廈外牆蔓延。社區群組流出嘅照片顯示，工程所用嘅密目網由山東一間化纖繩網公司提供，但該公司聲稱唔認識承建商宏業建築工程公司，引起對物料來源及監管嘅疑問。

《竹棚守則》雖然唔係法例，但有「特殊法律地位」，如果承建商無跟守則，相關行為可以成為法庭決定是否觸犯《工廠及工業經營條例》嘅因素之一。勞工處亦指出，雖然現行條例無硬性規管棚網阻燃標準，但處方於去年 12 月已再次澄清，棚網嘅阻燃效能必須符合標準，並強調巡查時有檢視相關證書。

事件引起強烈社會反應，政府高層其後迅速將焦點指向竹棚。政務司司長陳國基 27 日表示，發展局已同業界商討，以金屬鷹架全面取代竹棚架嘅可行性。他指出，竹棚雖然靈活、適合窄巷環境，但耐燃程度始終不及金屬架，政府會着手推動轉型，包括要求業界配合巡查及覆檢，並提供培訓予工人。

有中國官方背景嘅微信公眾號「牛彈琴」亦有評論事件，指今次大火屬「兩個想不到」——一係想不到會出現咁嚴重嘅火情，二係想不到安全隱患咁突出。文章提到內地早已全面採用金屬鷹架，而香港仍沿用竹棚，若再加上不合格網布同有人吸煙等違規行為，後果不堪設想。同時，網上大量疑為中國網軍唱衰竹棚，國內已經形成竹棚是大火主因嘅風向

不過，上海 1115 特大火災同巴黎聖母院大火所用嘅都係金屬棚架，兩場火災中金屬棚架同樣被燒到變形倒塌，導致重大傷亡。有人質疑政府是否真正為安全着想，抑或另有唔講明嘅政策考量。居民批評當局急於將責任推向棚架，但真正問題係工程管理混亂、地盤安全鬆散同監管制度失效。

火場外，仍有家屬攬住名單一遍又一遍讀住親人名字；庇護中心內亦有人呆望住手機，眼神空洞。政府派發嘅一萬元補助，有災民話「有好過冇」，但遠遠彌補唔到失去家園嘅痛苦。善後工作漫長而艱難，而呢場本來可以避免嘅災難，仲喺全港人心裏面燃燒緊。