美中貿易關係反覆之際，中國近日突然大量購入美國大豆，引起國際市場高度關注。外電消息指，中糧集團喺本月17日一口氣向美國買入至少14船大豆，總量約84萬噸，係今年以來最大規模嘅一宗採購。呢批大豆將於12月及明年1月分批付運。

雖然目前美國大豆期貨價格遠高於巴西貨源，但多名熟悉內情嘅亞洲貿易商直言，今次採購同市場因素關係唔大，主要係中國履行喺釜山峰會對華盛頓作出嘅承諾。有新加坡貿易商透露，中國今次操作已唔再係「善意姿態」，而係完全按照峰會協議執行。

早前喺10月30日韓國釜山舉行嘅特習會上，美方承諾會下調部分中國商品關稅；作為交換，中方答應喺年底前購買至少1200萬噸美國大豆，其後三年每年進口量唔少於2500萬噸。然而，美國農業部網站數據顯示，自峰會結束後，中國只係喺11月3日購入13.2萬噸，與協議規模有明顯落差。

貿易商指出，中糧集團今次買入嘅美國大豆價格比南美供應貴得多。以估算計，由墨西哥灣港口裝運嘅大豆，價格較芝加哥1月期貨高出每蒲式耳約2.35至2.40美元；西北部港口嘅報價亦高出約2.15至2.20美元，與巴西新季大豆比較差距巨大。有中國大豆加工廠人士直言，呢次採購明顯「帶有政治意味」，係為履行釜山峰會承諾。

去年中國自美國進口大約2700萬噸大豆，但喺美中貿易戰升級後，本季幾乎全面轉向巴西及阿根廷採購。今次大手採購美國大豆，外界普遍視為兩國喺新協議達成後，正嘗試恢復部分農產品貿易。

受消息刺激，芝加哥期貨交易所17日大豆期貨價格即時上升近3%，創下17個月新高。不過，中糧集團對外媒查詢暫未回應。