日本同中國最近爆發外交風波，日本首相高市早苗早前喺國會答辯時講到，假如台海出現戰艦封鎖、甚至武力攻擊，有機會構成日本行使集體自衛權嘅「存亡危機事態」。呢番講話一出，即刻引起北京不滿，中國駐大阪總領事薛劍喺社交平台發表極端言論，甚至爆粗話「嗰種骯髒頭顱就應該斬掉」，激起日本朝野強烈反應。

薛劍發文後輿論嘩然，多名日本議員要求政府將佢列為「不受歡迎人物」，並驅逐出境。有網民狠批佢係「對日本人民嘅侮辱」，又話外交官講呢啲說話「完全失禮」。帖文雖然被刪，但薛劍冇道歉，反而再貼中國軍艦相，態度強硬。

日本官房長官木原稔批評呢啲言論「極其不妥」，強調外交使節唔應該講出咁失當嘅說話。日本外務省已經透過駐華使館正式抗議，要求中方刪文同解釋。不過中國駐日使館暫時冇回應。

事件源於高市早苗上星期五喺國會被問到「台灣有事」會唔會構成日本《和平安全法制》下嘅「存亡危機事態」時講，如果有勢力封鎖台海、並出動武力攻擊，「有可能構成日本存亡危機事態」，政府要假設最壞情況。根據現行法例，假如同日本關係密切嘅國家遭攻擊，而情況威脅到日本存亡，政府可以宣布進入「存亡危機事態」，容許自衛隊行使集體自衛權。呢番說話被外界解讀為日本可能會介入台海衝突。

薛劍翌日喺社交平台轉發新聞報道，狠斥高市「應該斬掉」，仲加上憤怒emoji，引爆輿論。日本輿論譴責聲浪不斷升溫，中日關係再度緊繃。美國駐日大使葛拉斯亦喺社交平台發文批評薛劍「真面目再次暴露」，指佢早前曾將以色列比作納粹德國，今次又威脅日本首相，嘲諷北京「口講當好鄰居，行為卻粗暴無禮」。

至於中國外交部發言人林劍就反指，高市早苗發表「涉台錯誤言論」，係「粗暴干涉中國內政」，質問日本究竟想向「台獨」勢力傳達乜信號，是否想挑戰中國核心利益。高市昨日再被問到事件時，強調自己講嘅話係根據政府立場，冇打算撤回或道歉，但表示以後喺答辯時唔會再假設具體情境。自上任以來，高市多次強調「台灣有事即日本有事」，被視為日本政壇中對華強硬派代表人物。