「微笑劍后」江旻憓今日（3日）現身灣仔選舉事務處，正式報名參選立法會選舉，角逐旅遊界功能界別議席。佢掛上招牌笑容，在信和集團主席黃永光、旅議會主席譚光舜同美麗華集團首席營運總裁陳宗彝陪同下遞交表格並宣布參選，表示「好期待同業界一齊呈現香港最好一面，擦亮旅遊界嘅金招牌，繼續為港爭光」。

江旻憓透露，決定參選係因為一直希望回饋社會，「成日鼓勵學生要有勇氣追夢，唔怕辛苦、唔怕攰，我自己都要講得出、做得到。」佢強調已經申請放棄加拿大護照，並準備好政綱，希望由旅客角度推廣香港，「業界就係最了解香港有幾咁好」，期望能夠為旅遊界出一分力。

外界關心佢同旅遊界嘅關聯，江旻憓解釋，退役之後離開舒適圈，發現體育精神「適用於所有界別」。佢又回憶過去出戰國際賽時，唔少外國選手對香港充滿好奇，「佢哋問我邊度人，我話香港，佢哋話未去過，我就會同佢哋講下次一定要嚟。」佢希望能繼續吸引更多人嚟香港。

有消息指，江旻憓原本打算出戰新界北直選，但因資格問題未能成事，轉戰旅遊界別。據悉，佢為趕辦放棄加拿大護照手續，未能及時參與地區直選，亦未排除下屆再挑戰直選議席。

現年31歲嘅江旻憓去年喺巴黎奧運奪得女子個人重劍金牌後宣布退役，其後加入馬會擔任對外事務助理經理。馬會其後表示，已暫停佢所有職務，並唔會以任何形式參與佢嘅選舉活動。

江旻憓畢業於美國史丹福大學國際關係系，並喺中國人民大學同香港中文大學分別取得法律碩士與博士學位。佢喺人民大學嘅碩士論文以「一國兩制制度優勢」為題，提及「佔中禍害極大」同《香港國安法》有助完善制度。論文流出後一度引起輿論熱議，保安局局長鄧炳強更公開為佢辯護，批評攻擊者係「唔想香港好嘅小人」。

事實上，江旻憓早於2019年反修例運動期間，曾以自己膝傷比喻香港狀況，哽咽寄語市民「會好返」，被視為支持政府立場。近年佢多次出席愛國活動，亦曾喺《香港國安法》實施五周年論壇上表示，年輕時隨港隊訪內地時受到國家照顧，「國家係我哋最堅強嘅後盾」。被外界形容為「愛國運動員」嘅江旻憓，早前亦獲鄧炳強點名讚揚，指佢積極支持保安局青年工作。