澳洲同中國嘅軍機再喺南海上空對峙。澳洲國防部證實，一架澳洲皇家空軍P-8偵察機喺例行巡航期間，被一架中國解放軍蘇-35戰機近距離攔截。期間，中方戰機釋放多枚信號彈，其中兩枚極接近澳方軍機，情況一度相當危險。

澳洲副總理兼國防部長馬爾斯表示，事件發生時，P-8偵察機係依照國際法喺南海上空執行任務。雖然機上人員冇受傷，但佢形容中方行動「唔安全、唔專業」，已經喺堪培拉同北京分別向中方提出嚴正交涉。佢強調：「呢類行為有風險，雖然今次冇造成損失，但隨時可以引發嚴重後果。」

馬爾斯拒絕透露信號彈與軍機嘅實際距離，但話澳洲軍方人員即時作出反應，確保飛機安全脫險。佢補充，呢並非第一次出現類似情況，過去中國軍方亦曾喺澳洲軍機附近投放箔條同信號彈，甚至喺澳洲潛水員執勤時啟動聲納干擾。

事件發生時，正值澳洲總理阿爾巴尼斯前往華盛頓，準備與美國總統特朗普舉行首次正式會晤。外界認為，呢次南海對峙可能令澳中關係再添變數，亦為澳美高層會談增加外交壓力。

馬爾斯解釋，澳洲政府決定公開事件，係整體戰略嘅一部分，目的係揭示中國軍方喺區內嘅危險舉動，令國際社會清楚了解實況。佢喺堪培拉受訪時強調：「保持透明同清晰溝通係避免誤判嘅關鍵。」

佢又重申，澳洲會繼續同美國、英國、日本、菲律賓等國喺南海進行聯合行動同軍演，並強調「澳洲有權喺國際空域同海域自由行動」。佢話：「我哋會堅持維護以規則為基礎嘅國際秩序，同時確保國防人員安全放喺首位。」

另一方面，中國人民解放軍南部戰區空軍發言人李健健大校回應指，10月19號一架澳洲P-8A軍機「未經中國政府批准，非法侵入中國西沙領空」，中方依法採取跟蹤監視同警告驅離行動。佢強調：「澳方行為嚴重侵犯中國主權，極易引發海空意外。我哋正告澳方立即停止挑釁。」

澳洲反對黨聯盟黨外交事務發言人卡殊則批評事件「完全不可接受」，並要求總理阿爾巴尼斯利用同北京關係稍為改善嘅契機，與中方達成具體協議，防止類似挑釁重演。