台灣國安局最近發表最新報告，揭示台灣每日面對嚴峻嘅網絡攻擊威脅。報告指出，全台重要系統每日平均遭超過280萬次黑客入侵企圖，其中大部分來自中國嘅國家級網絡行動。中方透過解放軍、國安部同公安體系合作，連同民間黑客組織滲透潛伏，針對台灣政府、關鍵基建同產業供應鏈進行情報竊取同滲透操控，涉及範圍包括國防、外交、能源同通訊等核心部門。同時，台方亦偵破超過150萬則疑似由中共操控、意圖擾亂民意嘅網絡訊息。

報告指出，中方除咗利用暗網，亦善用社交媒體推動輿論攻勢，針對「漢光演習」、「罷免投票」同「能源政策」等議題製造假訊息風向。大量異常帳號被發現散播親中言論，削弱公眾對政府網絡防護能力嘅信任。國安局預料，明年地方選舉將成為中國網絡攻擊同輿論滲透嘅新目標。

正當報告出爐之際，台灣中央廣播電台（央廣）官網亦爆出內鬼黑入事件。調查顯示，工程師吳政勳涉嫌夥拍主管岳昭莒及伺服器供應商黃富琳，上月11日入侵官網首頁，換上五星旗，並以DDoS攻擊令網站兩度癱瘓，甚至計劃喺雙十節再度發動攻擊。三人經起訴後已獲保釋，分別以新台幣27萬、10萬及15萬元交保，但須配戴電子腳鐐並禁止出境出海。

吳政勳辯稱，自己多次通報網站後台漏洞未獲理會，因此以「黑入」方式引起關注，仲聲稱事件與民眾黨立委黃國昌有關，自稱「係黃國昌嘅人」。不過黃國昌回應，承認曾接獲吳政勳求助，但因資料不足未有跟進，並否認有指使任何人攻擊政府網站。

台灣資訊環境研究中心共同主持人游知澔批評，若真為揭露漏洞，應循正途通知相關單位，而唔係直接入侵，「專業嘅網安人員應該留下技術報告，而唔係黑入網站」。央廣其後發聲明，感謝執法部門迅速偵破案件，強調事件屬「嚴重破壞國安行為」，涉事員工已即時停職，並會全面強化網站防護。文化部長李遠表示，公共媒體員工應有更高嘅道德標準，政府會檢討國營媒體嘅網絡管理制度。

游知澔進一步指出，雖然台灣網安技術在全球名列前茅，但全民防護意識仍有待提升，「網絡攻擊越嚟越精密，冇全民意識，科技再強都防唔晒」。國安局呼籲各政府單位同民間企業加強監控及防護系統，防止外部勢力持續滲透。