滙豐控股宣佈，建議以每股155港元收購恒生銀行未持有嘅36.5%股權，涉資約1,061億港元。交易完成後，恒生將正式私有化並從聯交所除牌。

滙豐行政總裁艾橋智（Georges Elhedery）強調，今次私有化完全基於商業考慮，並非「救助行動」，亦同恒生嘅不良資產無關。他話，呢項交易反映滙豐對香港金融前景有信心，認為恒生品牌深植本地，是集團重要嘅零售銀行資產之一。滙豐未來會喺產品開發同跨境服務上加強協同，同時推行「精簡化結構」，以提升整體效率。

不過，市場反應各有看法。財經評論員利世民質疑滙豐未能清楚說明收購後嘅協同效益：「除非滙豐可以具體講出恒生點樣幫到佢哋，否則好難說服市場。恒生近年不良貸款比例上升，係全行最高之一。」佢指出，恒生喺商業地產業務上取態進取，風險暴露較高。

事實上，恒生不良貸款比例由2023年底嘅2.8%，升至今年6月嘅6.7%。滙豐去年已經着手加強恒生嘅風險管理。對於外界指滙豐今次係「出手相救」，艾橋智強調「絕非如此」，並表示對行業中長期前景保持審慎樂觀。

市場分析則意見分歧，有投資者認為今次私有化「正面且早應進行」，指出母公司與子公司同時上市本身就有治理矛盾。雖然交易溢價約三成，但認為透過整合成本可釋放更大效益。

恒生銀行嘅故事令事件更添情感色彩。1933年，何善衡、林炳炎、何添、李陳錦記喺中環創立「恒生」，以兌換同放款起家。到1950年代，恒生成為街坊熟悉嘅本地銀行，象徵穩健同信任。不過，1965年香港銀行危機爆發，恒生一度被擠提，最後由滙豐出手相救，自此成為滙豐子公司。1972年恒生成功上市，成為香港資本市場標誌。

半個世紀以嚟，「恒生」幾乎等同「香港人銀行」——綠色招牌、熟悉口音、街坊氣息，都成為集體記憶一部分。如今，滙豐以千億代價收回全部股權，象徵恒生將正式告別股市舞台。

消息一出，引起唔少港人討論。有網民問：「咁仲有冇恒生指數？」有財經專頁笑住回覆：「恒生只係私有化，唔係執笠呀！恒生指數唔洗改名，只係以後冇恒生～好似菠蘿包冇菠蘿一樣，味道仲係嗰個味！」