東涌線延線嘅東涌東站工程再度爆出醜聞，有傳用料未經批核，甚至「貨不對辦」。繼今年八月有設備房牆身磚被揭用咗中國A貨商標磚，取代原本合約指定嘅德國牌子之後，近日又有傳媒報道指，工程中使用嘅部分自攻螺絲同抗剪螺栓，未經港鐵批準就已經裝上去，結果被港鐵發出「不合格通知書」。

消息指出，事件涉及「東涌東站建造工程及軌道改道嘅相關備置工程」（1202合約）。有消息透露，承建商喺裝月台層牆身防火板時，用咗一批「唔知咩牌子」嘅自攻螺絲，呢啲物料未經港鐵批准，現場亦冇設立正式收貨或檢驗機制。

另外，喺安裝鋼橋過程中，用到嘅接近四千粒抗剪螺栓之中，有超過一成係喺未獲批核情況下使用。由於啲螺栓喺中國工廠製作鋼橋時已經裝咗上去，承建商根本唔能夠準確指出邊啲係未審核嘅螺栓、而家安裝咗喺邊個位置。不過，消息人士補充，其實合約入面冇特別要求自攻螺絲或抗剪螺栓要用指定品牌，所以承建商係有權自己選擇合適物料。

港鐵回覆傳媒查詢時確認，部分物料確實喺未完成批核程序前已經使用，因此向承建商發出「不合格通知書」。港鐵強調，呢個通知係品質管理程序中嘅一個重要部分，當發現施工唔符要求，會發通知以便盡快糾正問題。港鐵表示，承建商已經根據要求遞交補充資料等候批核，並喺地盤抽樣化驗。結果顯示，相關物料符合合約同法例要求。港鐵又補充，螺絲同螺栓涉及嘅兩個工序仍未進入交付階段，會繼續嚴格監察，確保所有程序都跟足規定。

不過，對於螺絲及螺栓嘅實際用量、用途位置、佔比影響，以及事件中有冇涉及偽造文件或其他不法行為等問題，港鐵就冇正面回應。

翻查資料，呢份由「保華－中鐵建國際」喺2023年5月投得嘅「東涌東站建造工程及軌道改道備置工程」合約，總值20.49億港元，預計2029年落成。工程早前已經出過事——今年八月，工程曾被揭發車站設備房牆磚用咗貼有A貨商標嘅中國磚，並非合約指定嘅德國牌。事件當時因德國磚香港代理多次舉報而曝光，涉事牆身最終被拆除。港鐵當時表示，相關磚料唔會喺工程中再用，已要求承建商提交報告並報警處理。