2022年上任嘅特首李家超，今年已經68歲，首個任期會喺2027年中完結。到時佢就年屆70歲，外界一直關注佢會唔會成為首位成功做滿兩個完整任期嘅特首。自1997年主權移交以嚟，歷任特首都未能突破「十年魔咒」，所以李家超嘅下一步，自然備受注目。

坊間一直有傳，當初北京揀李家超出任特首，係為咗喺社會局勢緊張時維持穩定，佢嘅角色更加被形容為「過渡性質」。因此，佢會唔會爭取連任，一直眾說紛紜。

《彭博社》早前喺「香港通訊」專欄刊登文章，題為《香港特首正準備歷史上最棘手的第二幕》，直指李家超完成首個任期之後嘅政治前景，將視乎佢能唔能夠喺經濟同政治之間搵到平衡。報道特別提到，「北部都會區」發展，或者已經成為北京畀佢定下嘅「關鍵績效指標」。

李家超喺最新施政報告中，首次清晰提出經濟轉型嘅願景，強調要推動「北部都會區」計劃，將香港北部邊境打造成科技同創新中心。佢仲親自出任督導委員會主席，承諾會精簡審批程序，加快項目落實，顯示出對計劃嘅重視。

法國外貿銀行高級經濟師吳卓殷接受訪問時表示，「北都」能否推得掂，可能係北京衡量李家超表現嘅一個關鍵。他指出，目前「北都」仍然係小村落，要轉型成為新經濟重鎮需時甚長，所以李家超同時積極鞏固香港傳統優勢，例如吸引高淨值人士落戶同推動投資。

雖然經濟轉型成為焦點，但李家超亦無忽視國安議題。佢喺唔同場合多次重申，會持續打擊被視為危害國家安全嘅行為，並強調會追究流亡海外嘅民主派人士責任。《彭博》分析認為，李家超嘅「第二幕」挑戰，就係點樣喺維持政治穩定同時推進經濟改革，成敗唔單止影響香港未來數年發展，仲關乎北京對「一國兩制」新階段嘅評估。

至於李家超係咪有意角逐連任，特首辦冇正面回應，只係表示佢而家首要目標係全面落實施政報告，專注「提振經濟同改善民生」。