加沙戰爭踏入第二年，美國民意迎來罕見逆轉。根據《紐約時報》同錫耶納大學最新民調顯示，美國選民對以色列處理戰事嘅觀感急劇轉變，負面評價明顯增加，支持巴勒斯坦嘅比例仲首次超越以色列。

調查結果顯示，目前只有34%美國選民表態支持以色列，稍低於支持巴勒斯坦嘅35%，另外有31%受訪者表示立場未定，或者對雙方態度相若。自1998年《紐時》開始追蹤數據以來，呢次係美國社會首次出現傾向巴勒斯坦嘅情況。學者指出，呢個轉變反映咗美國公眾因為對加沙戰爭不滿，而重新檢視長年以來嘅中東立場。

回顧2023年10月7日，當哈瑪斯發動突襲後，美國選民一度普遍支持以色列，支持度高達47%，而支持巴勒斯坦嘅僅得20%。但短短兩年間，立場發生咗翻天覆地嘅變化。

同時，選民對美國是否應繼續向以色列提供經濟及軍事援助，出現鮮明反對聲音。約六成受訪者認為，即使以色列人質未獲釋，或者哈瑪斯未被徹底剷除，以色列都應該停止軍事行動。另外有四成人直指以軍「蓄意」殺害加沙平民，比例幾乎係2023年調查嘅兩倍。

呢場輿論轉向，最明顯體現在民主黨支持者身上。兩年前，民主黨人對以巴立場幾乎持平，34%傾向以色列，31%支持巴勒斯坦。但最新數據顯示，全國基層民主黨人而家壓倒性地同情巴勒斯坦，比例升至54%，而同情以色列嘅僅剩13%。

至於共和黨，雖然整體仍然傾向支持以色列，但相比過去都出現輕微下滑，顯示戰事影響已經開始喺兩黨之間蔓延。年輕選民嘅立場更加鮮明。30歲以下嘅受訪者中，近七成人明確反對再向以色列追加援助，呢個態度唔分黨派，反映年輕世代對中東戰火嘅容忍度極低。

自1948年建國以嚟，以色列一直係美國最大援助嘅受益國，累計獲得數千億美元支持，但如今卻面臨來自美國社會前所未有嘅信任危機。呢項調查喺本月22日至27日進行，全美共有1,313名登記選民接受訪問，結果再次凸顯加沙戰爭對美國內部輿論帶嚟嘅深遠衝擊。