贊比亞近日爆發歷來最大規模環境官司，源於今年2月發生嘅一宗有毒廢料洩漏事故。事發地點喺北部銅帶省第二大城市基特韋附近，一個尾礦壩決堤，大量廢料衝入村莊同農田，最終流入有「生命之河」之稱嘅卡富埃河。呢條河流係全國超過一半人口嘅飲用水同灌溉來源，影響極其嚴重。
當地居民同農民指控，事故導致大批魚類死亡，農作物受污染被逼銷毀，更有人出現尿液帶血、胸悶等症狀。農民憶述，直至村莊同農田被淹幾日後，先得知水源被劇毒污染，估計涉及超過30萬戶家庭。出事嘅尾礦壩屬中資機構「贊比亞謙比希濕法冶煉公司」（SML）所有，但土地屬於「非洲礦業公司」。原告方指控事故源於工程缺陷同管理不善，並批評SML隱瞞事實。
根據法庭文件，約50名農民同176名居民已經入稟法院，要求SML等公司支付高達800億美元賠償，並交由政府設立專戶，用於環境修復同災民補償。佢哋仲要求設立2,000萬美元緊急基金，為受影響家庭提供即時援助同健康檢測。
贊比亞環境管理局其後委託南非公司調查，發現實際洩漏量比SML承認嘅數字高出20至30倍，約150萬噸，相當於100萬立方米。調查指污染物包括氰化物、砷、銅同鎘，全部達危險水平，長遠或會引致癌症甚至畸胎。調查公司表示已向SML提交初步報告，證實污染嚴重，但喺最終報告到期前一日便被單方面解約。
尾礦壩原本係存放礦石處理後廢料嘅專用設施，但今次決堤卻造成生態浩劫，更觸發贊比亞史上最大規模環境訴訟，被視為當地最嚴重嘅環境爭議之一。
面對指控，SML發聲明否認責任，指訴訟「毫無根據」。佢哋堅稱洩漏量僅為5萬立方米，事故數小時內已受控，並已向受影響地區提供協助。至於調查報告，SML批評數據不準確，並指對方違反合約，所以提前終止合作。SML強調事後已按政府指示參與復原工程，履行咗應有責任。
>
