俄羅斯外交部長拉夫羅夫喺聯合國大會期間出席二十國集團外長會議時公開表示，俄羅斯同北約同歐盟因為烏克蘭問題已經處於「戰爭狀態」，直言對方唔單止全面支持基輔，仲已經直接參與其中。

喺拉夫羅夫發表呢番言論之前，美國總統特朗普喺23號「真相社交」發文，嘲諷俄羅斯陷入經濟困境，形容係「紙老虎」，並強調只要北約同歐洲盟國繼續提供資金同軍事支援，烏克蘭完全有能力收復自2022年以嚟被俄軍佔領嘅所有土地。佢指出：「俄羅斯冇目的咁打咗三年半嘅仗，而一個真正嘅軍事強國，一星期內就可以收場。」

特朗普仲提出，北約成員國應該有權直接擊落侵犯其領空嘅俄羅斯無人機。呢啲強硬言論獲得部分盟國響應，但亦激起俄方強烈不滿。

美國國務卿魯比奧24號同拉夫羅夫會晤時，呼籲俄方要採取實際行動，推動持久和平，並重申美國同盟國嘅立場一致，要求盡快結束戰爭，同時呼應特朗普支持烏克蘭嘅講法。

不過，俄羅斯軍事行動近期再次引發北約同歐盟緊張。《彭博》報道，上星期俄軍戰機闖入愛沙尼亞領空，而過去一個月內，俄羅斯無人機亦多次出現喺波蘭、羅馬尼亞上空，甚至丹麥都有無人機侵入機場嘅事件。多名歐洲外交官透露，英國、法國同德國官員早前喺莫斯科會晤時已經警告俄方，如果再有類似行為，北約盟國唔排除會直接擊落俄羅斯飛機。

對於外界警告，俄羅斯方面亦作出強硬回應。俄羅斯駐法大使梅什科夫警告，如果北約真係以領空侵犯為由擊落俄軍飛機，後果只能係「戰爭」。佢直言：「唔少飛機意外甚至刻意進入過我哋嘅領空，但我哋冇選擇擊落。如果北約真係敢咁做，衝突只會進一步升級。」

近期俄軍戰機同無人機頻繁行動，已經迫使北約多次召開緊急磋商。歐洲官員私下指出，如果俄方再挑釁，西方勢必加強軍事應對，保障成員國安全。種種跡象顯示，俄羅斯同北約同歐盟嘅對峙正不斷升級，雙方既有言辭交鋒，又有軍事摩擦，外界憂慮衝突隨時可能擴大。