本月初舉行嘅國際熱氣球節，本來打算成為中環海濱嘅大型盛事，但因為未能安排載客，最終變成「睇放風箏」場面，令市民大失所望，更有人直言「盛事變笑話」。文化體育及旅遊局局長羅淑佩25日出席立法會質詢時，詳細交代事件經過，並指出政府部門早喺活動揭幕前一星期，已經喺會議上提醒主辦機構，載客熱氣球成功獲批嘅機會「微乎其微」，並建議對方及早向公眾公布同安排退款。

羅淑佩解釋，呢個活動由私人機構籌辦，主辦方喺今年4月已通知政府相關部門，話承租咗中環海濱活動空間，希望獲得牌照協助。到7月8日，主辦方正式遞交所需牌照申請。不過，8月20日舉行嘅實地熱氣球測試效果唔理想，顯示存在安全風險。其後8月27日，政府部門同主辦機構會面時，已經清楚表明，只有測試成功後，先會考慮批准「展示」熱氣球嘅牌照。

至於市民最關注嘅載客安排，羅淑佩透露，主辦方曾表示只可以喺活動前一兩日再進行測試，時間相當倉卒。部門當日已經「清晰」提醒主辦方，成功審批嘅機會非常渺茫，建議盡快宣布取消載客項目，並為已購票市民安排退款或者其他補償。不過，主辦機構仍然選擇拖到最後一刻，直至9月3日，即活動開幕前一日，先再試一次。最終，政府經過審慎評估，只批准翌日活動可以「展示」熱氣球，但唔可以載客。

羅淑佩直言，今次事件反映溝通方式需要改善。佢話未來除咗透過會議同電話外，當局會考慮「好清晰用文字」同主辦方溝通，甚至「認真寫一份書面文件畀佢哋」，以避免主辦方再抱「搏一搏」心態，令政府被動應對。佢強調，如果主辦方一意孤行，當局都有書面紀錄可跟進，方便喺商品說明或消費者保障方面採取進一步行動。

實政圓桌議員田北辰就建議，政府應設立統一部門，專責審批大型盛事宣傳內容。他舉例話，如果熱氣球節喺宣傳時清楚列明要到活動前一兩日先知能否載客，就可以畀市民自行衡量買唔買飛，「如果咁樣講清楚，基本上今次就無咩問題」。羅淑佩回應指，局方會認真研究，並思考相關安排是否可行。