路透社引述兩名歐洲安全官員同相關文件報道，指中國無人機專家自舊年第二季開始，多次去俄羅斯，仲同當地國營軍火商I E M Z庫波爾展開軍用無人機技術研發，雙方合作關係愈嚟愈密。

消息人士透露，中方技術人員過去一年多以來至少六次到訪庫波爾；同時，該公司仲透過俄方中間商，向中國入口攻擊型同偵察型無人機。路透社取得嘅商業發票同銀行對帳單顯示，庫波爾舊年曾經購買中國四川愛易航空科技公司生產嘅十多架單程攻擊無人機，供應商係俄羅斯國防採購商T S K 域陀。呢間公司已被美國同歐盟列入制裁名單。四川愛易同域陀暫時未有回應查詢。

路透社早喺舊年九月已經披露，庫波爾正同中國專家一齊開發新型無人機。最新資料首次揭示，中方技術團隊已經深入參與俄羅斯境內嘅無人機測試同技術工作。有安全官員形容，呢個情況反映庫波爾同中國企業喺無人機研發方面嘅合作正不斷加深。

美國同歐洲政府一直高度關注中國企業支援俄方軍備生產嘅問題，並且已經針對部分俄國企業實施制裁。路透社喺七月報道過，庫波爾正利用中國製零件（包括引擎）批量生產長程攻擊無人機。新款無人機參考伊朗「見證者」設計，可以長距離自主飛行去到目標，再俯衝自爆。

烏克蘭軍事情報機關向路透社表示，俄羅斯而家正用緊呢款遠程無人機，每個月大概出動500架次，用嚟攻擊烏克蘭境內深處嘅軍事同民用目標。兩名安全官員仲指出，中國持續小規模運送攻擊無人機到俄羅斯，再加埋專家親身去當地合作，或者意味庫波爾計劃擴充新型無人機產量。

對於相關指控，中國外交部話唔知情；克里姆林宮、俄羅斯國防部同庫波爾都未有回應。路透社強調，無法獨立核實有關無人機出貨嘅真正原因，或者中國專家喺俄羅斯工作嘅具體內容。