英國改革黨黨魁法拉奇昨日喺倫敦開記者會，宣布如果改革黨喺下屆大選勝出，將會推行一系列嚴格移民政策，要求已經攞到居英權嘅移民重新申請簽證，仲會取消永久居留制度。外界關注，呢啲措施可能會波及自2021年透過BNO簽證計劃移居英國嘅港人，數十萬人隨時受影響。

法拉奇聲言，現行制度令外來人口急增，公共開支壓力沉重，形容「英國唔係世界嘅食物銀行」。佢指改革黨計劃切斷移民通往公民身份嘅主要途徑，要求每五年重新申請簽證，條件比依家更加嚴苛，包括收入門檻由每年41,700鎊（約港幣43.7萬）提高到60,000鎊（約港幣62.9萬），英文水平要求亦會加高。

根據方案，非英國公民將無權領取公共福利。法拉奇話，透過大幅限制移民，未來幾十年可以為英國慳到高達2,340億鎊福利開支。佢又批評好多移民嚟到英國之後無做嘢，甚至從來冇就業過，令納稅人要承擔沉重負擔，強調福利應該只屬於英國公民，就好似其他國家一樣。

記者問到，係咪連領緊退休金嘅移民都會被驅逐？法拉奇回應話，呢啲人可能已經攞到公民身份，否則本身唔會有資格攞退休金。不過佢補充，自己最擔心嘅係「唔事生產嘅年輕人」。

不過，佢所引用嘅節省開支數字旋即引發爭議。有消息指相關估算係來自「政策研究中心」嘅智庫報告，但該機構已經撤回文件，仲澄清數據唔應該被引用。財政大臣李韻晴批評法拉奇嘅講法完全冇根據，強調現屆工黨政府已經着手削減非法同合法移民。

工黨國會議員斥責改革黨嘅方案屬於種族主義名，如果一名英籍員工同外籍同事一齊做咗五年工，之後同時被裁，英籍員工可以攞國民保險補償，但外籍同事卻攞唔到，呢種差別待遇就係歧視。

根據英國國會數據，截至2022年，英國大約有135,000名香港出生嘅常住居民。自2021年初BNO簽證計劃推出以嚟，到2024年再有約150,000名港人移居英國，總數約285,000人。外界擔心，如果改革黨政策落實，呢批港人好可能成為最大受影響嘅群組之一。