美國國會「美國與中國共產黨戰略競爭特別委員會」昨日召開圓桌會議，重點討論香港喺中國規避制裁同洗黑錢問題上嘅角色。出席會議嘅包括詹姆斯敦基金會研究員張崑陽同人權律師畢肯特。

張崑陽指出，北京正有系統咁將香港塑造成一個金融工具，藉此繞過國際審查。他話，香港已經係中國對外直接投資嘅主要渠道，超過七成中資經香港流出；隨住美國收緊審查，越嚟越多中資企業選擇喺港集資，預計2025年新上市公司有九成來自中國。他警告，呢啲資金流動可能會支撐中國嘅「軍民融合」戰略。

佢又提到，香港係人民幣國際化嘅核心，處理大約八成全球人民幣支付，仲持有大量離岸人民幣存款，令北京得以建立繞過美元體系嘅平行金融網絡，方便同俄羅斯、巴西等國進行貿易時規避制裁。同時，香港亦快速發展成為全球最大嘅財富管理中心，大量美國基金進入香港，可能無意中成為北京戰略野心嘅資金來源。張崑陽形容，香港已唔再係單純嘅自由市場，而係北京嘅「金融航空母艦」，呼籲國際社會重新審視香港嘅經濟地位，甚至考慮撤銷其世貿組織成員資格。

畢肯特就形容香港係一座「雙面城市」，一方面係國際金融中心，西方銀行家同受制裁官員可以來往無阻；另一方面卻係一個異見零容忍嘅威權社會，新聞工作者、學運領袖同人權律師被監禁，市民生活亦處處受監控。佢指出，雖然西方對俄羅斯嚴格制裁，但香港已成為主要規避樞紐，自俄烏戰爭爆發以嚟，香港出口咗大約7.5億美元軍用零件去俄羅斯。

畢肯特建議美國國會採取三項措施：增加「工業與安全局」資源打擊非法貿易；通過《制止中共洗錢法案》，研究是否將香港列為「主要洗黑錢關注地區」；以及對為非法貿易融資嘅香港銀行實施二級制裁，以切斷資金鏈。他同時批評，許多西方企業透過香港中轉貨物以規避制裁，部分公司明知最終貨物會去到俄羅斯卻「裝作唔知」，認為必須加強審查責任，防止企業繼續逃避法律。

會上有議員質疑香港早已失去「高度自治」。張崑陽直言，香港存在大量政治犯，所謂嘅自治早已蕩然無存，北京全面操控香港經濟同金融。他又指出，習近平推動「大灣區」整合，將香港納入中國金融生態，徹底淪為中共利益嘅「武器」。

張崑陽仲警告，如果台海爆發危機，北京可能透過香港金融體系凍結外資，將美國同台灣嘅資本變成人質，迫使台灣喺政治上讓步。