位處「第二島鏈」嘅太平洋島國帛琉，因為總統惠恕仁嘅強硬表態，再次成為國際焦點。佢早前出席太平洋島國論壇時公開講到，帛琉「已經同中國處於戰爭狀態」，並強調國家正「不斷受到北京威脅」。佢直指，中國唔止係透過經濟同外交手段打壓，仲喺暗中削弱帛琉領導層嘅穩定，甚至利用「毒品」戰術進行非傳統戰爭。

惠恕仁喺夏威夷一場國際軍事法律會議上透露，中國外交官曾經以觀光利益作籌碼，聲稱可以提供「100萬名遊客」，條件係要帛琉切斷同台灣嘅邦交關係。佢當場拒絕，仲直言「要顧及人民長遠安全，而唔係單純嘅金錢利益」。佢指控北京刻意「侵蝕帛琉領導層、擾亂服務運作、削弱民眾對政府嘅信心」，仲爆料中國透過「海拋」方式，將大量密封毒品丟入洋流，再流入帛琉水域，用「毒品」嚟發動戰爭。

翻查資料，惠恕仁今年4月亦公開表態，帛琉唔會屈服於中國壓力，台灣繼續係盟友。佢講到：「中國嘅唯一目標，就係要我哋放棄台灣，但呢個係我哋嘅主權決定，冇國家可以干涉。」佢仲用婚姻嚟比喻邦交關係，強調「一旦結婚，就永遠喺一齊，直到死亡分開」。

澳洲智庫「洛伊研究所」分析指出，帛琉多年嚟一直係中國喺太平洋推行脅迫戰術嘅前線。中國將旅遊依賴「武器化」，又透過中資開發商收購靠近美軍設施嘅土地，跨國犯罪活動亦愈趨猖獗。報告提到，惠恕仁多次重申，美軍駐紮帛琉對當地國家安全至關重要。

帛琉係目前僅存三個同台灣有邦交嘅太平洋島國之一。外界關注，明年論壇將由帛琉主辦，有成員已表態希望台灣同其他國家能夠被納入會議。與此同時，北京正積極拉攏其他太平洋島國，今年已成功迫使所羅門群島喺論壇中排除台灣、美國同日本。惠恕仁嘅強硬言辭，無疑令中帛關係再度陷入高度緊張。