中國國家統計局日前公布數據，顯示8月多項經濟指標持續放緩，進一步突顯房地產低迷、通縮壓力同就業市場惡化等問題。零售銷售按年只增長3.4%，唔單止低過7月嘅3.7%，仲比市場預期嘅4%差。工業增加值只升5.2%，都遜於7月嘅5.7%同分析員之前預測嘅5.8%。

房地產市場依然未見起色，今年1至8月全國房地產開發投資按年跌12.9%，跌幅比1至7月嘅12%再擴大；同期新建商品住宅銷售額下滑7%，較上個月6.2%嘅跌幅更惡化。根據官方統計，70個大中城市8月平均房價仍比去年同期跌3%，雖然跌幅比7月嘅3.4%略有收窄，但整體頹勢未改。

失業情況方面都轉差。隨住大量畢業生湧入勞動市場，8月全國城鎮調查失業率升到5.3%，比7月嘅5.2%稍高。外貿方面，8月出口按年只增長4.4%，創下近半年最慢增速。

物價層面上，通縮陰影仍未消退。官方數據顯示，生產者物價指數已經連續接近三年處於收縮狀態，8月按年再跌2.9%；消費者物價指數就徘徊喺零附近，8月仍按年跌0.4%。

分析認為，中國今年主要刺激措施，係自2024年推出嘅「消費品以舊換新」計劃，以補貼鼓勵民眾買家電同電動車，帶動部分零售增長。但由於大宗商品購買頻率有限，計劃後勁明顯不足。

外界指出，中國經濟喺上半年一度出現「意外增長」，但近期已經浮現「夏季疲乏」跡象。華府智庫學者同經濟顧問認為，喺全球貿易局勢緊張、內需疲軟同惡劣天氣多重打擊下，中國以出口同投資為主嘅增長模式正面對嚴峻挑戰，如果要穩住經濟，就必須加快調整結構，更多依靠消費帶動。

不過，部分分析人士指，只要全年經濟仲有望達到官方定下嘅約5%增長目標，北京未必急於推出新一輪大規模刺激措施。但隨住美國加徵關稅影響全球貿易，加埋企業去庫存效應逐漸消退，下半年經濟增幅好可能難以維持上半年嘅水平。