呢次係自1949年北約成立以嚟，最嚴重嘅領土入侵事件。9月9號晚11點半到第二日朝早6點半之間，有19架俄羅斯無人機闖入波蘭領空。波蘭戰機同早前部署到波蘭嘅荷蘭F-35戰機擊落咗部分，另有啲墜毀，其中一架跌咗入波蘭境內300公里深嘅地方。

波蘭政府隨即引用北約《第四條》，要求立即同盟友協商。波蘭軍方直斥事件係「侵略行為」，總理杜斯克就指出，呢係首次有俄羅斯無人機喺北約領土上被擊落，仲話波蘭「自二戰以嚟最接近公開衝突」。

俄羅斯無人機同導彈過去唔止一次入侵北約領空。烏克蘭官員甚至投訴過，盟友對呢啲事件選擇視而不見。今年8月底，一架「見證者」無人機喺波蘭東部一片玉米田墜毀，離首都華沙得120公里。今年初，俄羅斯一枚KH-101導彈短暫掠過波蘭邊境；而據烏克蘭講，俄軍針對德涅斯特河烏克蘭港口嘅無人機，曾經飛到羅馬尼亞境內。芬蘭同愛沙尼亞亦先後指控俄羅斯軍機侵犯佢哋領空。

但今次規模遠超之前嘅違規。大批無人機迫使波蘭多個機場暫停運作。波蘭總統納夫羅茨基形容，呢係「北約同波蘭歷史上前所未有嘅時刻」。杜斯克喺議會發言時呼籲北約成員「全面動員」，仲批評有人喺俄烏戰爭入面成日鬧歐洲國家，而唔係針對俄羅斯：「當俄羅斯侵略意圖咁清晰嘅時候，唔好喺西方搵敵人。我哋東面嘅敵人已經夠有威脅。」

更大挑釁可能仲喺後頭。9月12號起，俄羅斯會喺波蘭邊境隔籬嘅白俄羅斯舉行「西方」軍演，名義上動員1.3萬人，但實際數字預計會大得多，好似2021年秋季嘅演習，就有20萬部隊參與，五個月之後俄羅斯就出兵入侵烏克蘭。

波蘭唔敢掉以輕心。杜斯克9號宣布會喺演習前關閉同白俄邊境，但俄羅斯無人機就喺幾個鐘之後出現，其中好多係直接由白俄飛入波蘭。白俄方面聲稱，無人機係因為俄烏雙方使用電子戰設備先「偏離航道」。俄羅斯國防部亦話，無人機入侵係「無意中發生」，本來目標係烏克蘭，強調無針對波蘭，仲話願意同波蘭防長協商。

不過，專家普遍唔信。波蘭智庫嘅安全專家斯維爾琴斯基直言：「點可能有成19架無人機同時失控？呢次應該係蓄意入侵。」一名熟悉事件嘅西方軍事高層亦話，俄軍似乎係有意測試波蘭防空漏洞。倫敦嘅國際戰略研究所認為，墜落喺波蘭嘅無人機價錢平，主要用作誘餌干擾烏克蘭防禦。烏克蘭情報部門仲聲稱，呢款無人機最初係由中國公司研發。

波蘭政府今次反應比以往果斷，但暫時無引用北約《第五條》集體防禦條款。呢條款需要確認係「武裝攻擊」先啟動，而唯一一次啟用係2001年911恐襲。波蘭似乎想留有後手，以應付未來更大規模嘅俄羅斯挑釁。北約《第四條》之前只係用過七次，最近一次係2022年俄羅斯全面入侵烏克蘭之後。

俄羅斯似乎想測試北約盟國對挑釁嘅反應。普京長期目標就係分化北約，證明成員國唔願意履行條約保障。北約秘書長呂特警告俄羅斯「立即停止侵犯北約領空」，仲強調「我哋會保護北約每一寸領土」。杜斯克話已經同芬蘭、丹麥、挪威、瑞典同波羅的海三國傾過，形容佢哋都係「最清楚睇到俄羅斯威脅」嘅國家。

呂特形容俄羅斯入侵行為魯莽危險，但強調盟軍情報仲喺分析入侵係咪蓄意。普京就等緊睇，今次前所未有嘅侵犯北約領空會唔會有實際後果——如果無，咁就更接近佢想要嘅目標。