卡塔爾首都多哈9號多區傳出爆炸聲巨響，天空濃煙滾滾，嚇到唔少居民以為爆炸就喺屋企附近。目擊者話至少聽到五聲爆炸，阿爾瓦赫達拱門同珍珠門塔一帶籠罩喺濃煙之中。

美國駐卡塔爾大使館其後喺社交平台出公告，證實已經向館舍同美國公民發布就地避難令，呼籲留喺安全地方。約旦外長薩法迪亦喺X平台強烈譴責，以色列對多哈嘅襲擊公然違反國際法，仲放言如果卡塔爾選擇回應暴力，約旦會同佢一齊應對。

以色列國防軍同情報單位「辛貝特」發聲明，確認行動係針對哈馬斯高層。以色列總理內塔尼亞胡辦公室就話，呢次行動係由以色列單方面策劃同執行。白宮承認喺襲擊前已經知情。據以方透露，哈馬斯領導層多年嚟將多哈視為加沙以外嘅「總部」，今次亦係以軍首次喺卡達境內出手。

以色列傳媒引述官員消息，指行動代號「烈焰之巔」，目標包括哈馬斯首席談判代表哈亞、西岸領袖賈巴林，前政治局主席邁沙阿勒據報亦在場。路透社報道就話，大部分談判官員倖免，但仍有兩名哈馬斯成員死亡。半島電視台則話，襲擊發生時，哈馬斯代表正商討美國提出嘅加沙停火方案。

卡塔爾外交部猛烈抨擊事件，形容係「懦弱行徑」，指襲擊嚴重威脅居民同外籍人士安全，亦係公然違反國際法同國際準則。巴勒斯坦解放組織副主席謝赫喺X發文，批評以色列嚴重侵犯卡達主權，破壞地區穩定。

聯合國秘書長古特雷斯公開譴責，認為以色列行動係對卡塔爾領土完整嘅侵犯，強調卡達一直積極推動加沙停火同協助人質獲釋。半島電視台記者報道，襲擊發生喺住宅區，而唔係偏遠地帶。以軍總參謀長薩米早前曾經揚言，要追殺所有居於海外嘅哈馬斯領袖。