好多時候，想打爛個制度嘅人，最後反而自己要去管理個制度。喺歐洲，極右派已經開始有呢個可能性出現。無論係英國、法國定係德國，佢哋喺民調上都排前；意大利已經係極右執政；荷蘭曾經由佢哋短暫領導過聯合政府；波蘭今年六月，極右總統候選人仲成功擊敗咗中間派。去到2027年，極右可能會執政，覆蓋接近一半歐洲GDP嘅經濟體。

呢樣嘢對歐洲繁榮係沉重打擊。直接嘅威脅係，極右一旦掌權，就會輕視專業管治，話要保護選民免受競爭同「創造性破壞」，用補貼同減稅去收買人心。呢種路線只會換嚟更大嘅經濟停滯，甚至債市危機。間接嘅威脅係，主流政黨喺好多地方已經開始驚極右崛起，唔敢推動艱難改革，反而照搬佢哋嘅政策，結果可能加快咗極右上台。

歐洲經濟近年本身已經表現差，GDP每年得1%增長。英國30年期公債孳息率9月2日升到5.7%，創25年新高。法國總理白魯宣佈9月8日進行信任投票之後，法國30年期公債孳息率升到4.46%，係2008年以嚟最高。德國，呢個曾經嘅歐洲經濟火車頭，自2019年以嚟幾乎無乜增長。

有啲人會覺得，咁差嘅表現咪正正證明咗極右話歐洲需要新方向？但佢哋嘅「新」方向，實際上只會令管治更差。

事實上，極右政黨一旦接近權力，多數會收斂。退出歐元區、脫離歐盟嘅主張而家多數淨係講下，雖然德國另類選擇黨仲偶爾拎出嚟講「脫歐」。佢哋都識，喺人口老化之下，需要引入外勞，而唔係完全鎖國。最重要嘅，佢哋想避免搞到經濟大混亂，嚇走選民。

不過，正因為咁，佢哋反而會成為「經濟窒息者」。意大利嘅梅洛尼對歐洲相對溫和，但佢完全唔敢做任何刺激增長嘅改革，以免得罪選民。美國嘅MAGA有親科技、放鬆管制嘅派系，但歐洲嘅民粹，就係掛住一個虛構嘅「美好過去」，拒絕競爭，保護特定群體，抗拒市場改革。

更大嘅問題係，極右喺財政上花費無度。幾乎所有民粹政黨都主張稅務減免，再加上對養老同有細路家庭派錢，話係要鼓勵本地人生育。佢哋聲稱，可以靠削減移民福利、打擊「食福利」嘅人、縮減公務開支、減少交俾布魯塞爾嘅資金，去平衡預算。英國改革黨承諾大約2000億鎊嘅「大派糖」，相等於英國GDP嘅5%，但就話自己可以慳返1000億鎊開支，好多數字含糊到唔可信。

債市一定會戳穿呢啲幻象。低增長加上財政散漫，遲早會搞到財政危機。最好情況下，可能會逼返理性啲。好似意大利，仲記得歐元危機陰影，梅洛尼而家都要保持財政收緊，因為要靠歐洲央行批准預算先攞到援助。

但如果真係再爆歐元危機，民粹只會令危機更危險。依家歐洲央行已經變相成為各國最後貸款人，靠住德拉吉嗰句「不惜一切代價保住歐元」。上次疫情，歐盟仲有團結去搞復甦基金。但如果到時法國係由馬琳勒龐或者巴爾德拉領導，喺歐元區危機時，各國政府要同央行通宵傾掂數，市場會無情懲罰任何猶豫不決。以往每次危機，答案都係「更多歐洲」，例如銀行監管、共同發債。但對住一啲承諾「要少啲歐洲」嘅政黨，要再走「更多歐洲」嘅路，根本難以想像。債市一定會測試歐元區凝聚力。

最可怕嘅係，呢種危機感而家已經壓住歐洲經濟。好多主流政客，驚改革會比極右把柄，寧願乜都唔做。德拉吉去年提過一大堆建議，例如整合金融市場、簡化規管，但全部停咗喺度。

歐洲政客陷入死胡同：改革會得罪人，緊縮會令極右「大派糖」更吸引，唔做嘢又會繼續令民心流失。要推動真正改革需要極大勇氣，但如果選擇沉淪，就等於將未來拱手交俾極右。