香港自由委員會基金會今日發表新報告，嚴厲批評仲喺香港終審法院任職嘅6名海外非常任法官，直指佢哋繼續留任，等同為一個被「武器化」嘅司法制度背書，掩飾港府透過法律打壓民主派嘅行為。報告呼籲有關法官盡快辭職，唔好再替當局「粉飾太平」，並建議各個民主國家應該對涉政治檢控嘅港府官員同法官實施制裁。

呢份名為《仍在為迫害增添光環：為何香港外籍法官辱沒普通法傳統》嘅報告，由約瑟夫撰寫，係香港自由委員會基金會去年報告嘅延續。報告詳細列出自2024年 3 月以來，已經有 6 名外籍法官先後辭任，部分人仲公開表示擔心香港司法獨立已被侵蝕，驚自己會被捲入政治檢控案件。

報告提到，留任嘅法官雖然好少直接處理國安案件，但依然參與咗部分高度政治化嘅裁決，例如駁回壹傳媒創辦人黎智英嘅上訴、維持前支聯會副主席鄒幸彤「煽惑他人參與未經批准集結」罪成，以及支持律政司就前立法會議員林卓廷披露「 7 2 1 」事件相關調查提出終極上訴。報告強調，呢啲判決全部涉及核心民主派人士，外籍法官嘅存在只會幫當局更容易為打壓行動披上合法外衣。

自由委員會基金會英國及歐盟總監薩巴赫直斥，呢啲外籍法官繼續留任，只會成為港府壓制異見嘅幫兇。他話：「呢啲退休嘅普通法法官竟然甘願俾人利用，替打壓行為粉飾，掩蓋《基本法》原本保障嘅言論、新聞同集會自由已經被剝奪嘅事實。佢哋應該體面辭職，否則就係助紂為虐。」

報告進一步指出，自2019年以嚟，已經有超過 1,900 人因涉政治案件被捕或判刑，其中包括好多主要民主派領袖。「47 人案」中仲有 45 人被判 4 至 10 年刑期。此外，北京仲透過海外通緝、懸紅追捕、吊銷護照同騷擾流亡人士家屬等手段，加強跨境打壓。

報告特別點名來自澳洲、紐西蘭同英國嘅外籍法官，批評佢哋繼續留任會引發嚴重道德爭議，甚至同返佢哋本國嘅司法價值觀相違背。

基金會同時提出四大建議，包括要求所有外籍法官立即辭職，避免繼續替威權統治提供正當性；呼籲美國國會加快通過《香港司法制裁法案》，追究涉事法官同檢控官責任；並促請英國、加拿大等普通法司法管轄區跟隨美國，對港府有關官員同法官實施制裁。

另一項建議係，若果公民接受喺香港出任司法職務，應該被禁止返本國出任公職，例如國會議員或委員會成員，以避免利益衝突。報告又指出，現時仲留任嘅 6 名外籍法官之中，有 4 人嚟自澳洲同紐西蘭，兩國司法機關應該明確表態，唔建議佢哋再繼續留喺香港司法體系，因為呢個制度已經淪為打壓民權嘅工具。