《港區國安法》喺2020年6月實施之後，好多港人選擇透過B N O簽證計劃移居英國展開新生活。不過，佢哋多年辛苦儲落嘅強積金，因為北京拒絕承認B N O護照係有效身份文件，無法以「永久離港」為由提取，涉款高達大約10億英鎊。據了解，大部分資金依家仍然存放喺滙豐銀行所監管嘅帳戶。

人權組織「香港監察」指出，自計劃推出以嚟，已有超過16萬港人移英，但喺佢哋離港之際，強積金提款卻遇到阻滯。部分港人表示，資金凍結令佢哋喺英國嘅定居同置業計劃大受打擊，甚至連醫療開支都難以應付。現居倫敦南部薩頓嘅33歲IT從業員Alpha就話，媽媽需要昂貴牙科治療，但佢唔敢冒險向滙豐申請提取強積金，「要提款就要公開身份，但對我哋嚟講並唔安全，佢哋將離開香港嘅人視為叛徒。」

另一名現居愛丁堡嘅教師透露，佢帳戶入面有大約5萬英鎊強積金，本來打算用嚟置業，但依家已經唔抱希望：「如果可以帶埋筆錢過嚟，生活會安定好多，但依家唯有繼續租屋。」唔少移英港人更加擔心，以B N O身份查詢或提款可能會留低紀錄，甚至俾中國特工有機會監視行蹤。有港人直言，大家寧願放棄，因為「連取回血汗錢都覺得危險」。

滙豐銀行回覆時強調，根據香港法例同中國政府規定，佢哋無法批出呢啲款項，仲聲稱銀行冇酌情權，否則會面臨巨額罰款。不過，有倡議人士反駁，指相關凍結令根本無法律基礎。英國國會議員麥道國更加批評事件係「絕對嘅醜聞」，強調英國政府有責任幫助受影響嘅港人，唔可以任由中國影響力伸延。

事件亦引起英國政界關注。影子財政大臣施榮達批評工黨政府未有積極處理問題，敦促官員要向北京施壓，幫助港人取回屬於佢哋嘅資金，而唔係「為咗少少利益就屈服」。佢直言，如果政府嘅對華策略真正有效，強積金問題早就應該解決。

值得一提，英國商貿大臣韋諾韜將會喺9月訪華，外界擔心佢此行可能喺重啟中英貿易談判上對北京作出讓步。施榮達就強調，港人強積金被凍結涉款上億英鎊，當局理應喺外交層面堅定表態，而唔係選擇視而不見。