前《蘋果日報》創辦人黎智英同六名前編採人員被控串謀勾結外國勢力一案，今日（21日）踏入結案陳詞第四日，辯方繼續發言。庭上焦點圍繞黎喺《國安法》生效前後嘅言論同帖文，雙方再度爭議不斷。

法官李素蘭今早發問，質疑黎智英係咪喺《國安法》實施後，仍然希望外國會制裁中國。辯方資深大律師彭耀鴻回應話，佢唔可能「讀心」，無法知道黎嘅內心世界；即使黎可能希望制裁發生，但並無實際行動去推動，強調：「以前合法嘅事，當法律改變後變成非法，常理上冇人會明知犯法仲要做。」

控方曾經舉出黎喺 Twitter 嘅言論作為證據，包括佢回應前《蘋果》副社長李兆富轉發美國要求中國關閉駐休士頓領事館嘅新聞，黎留言稱：「特朗普用一系列制裁做競選策略好聰明，拜登淨係識講，佢會行動，事實勝於雄辯。」控方認為，呢啲說法顯示黎支持甚至鼓勵制裁。彭耀鴻反駁指，黎只係就新聞作評論，表達認同唔等於提出請求，更加唔等於串謀。

李運騰法官其後質疑，即使控方承認黎喺《國安法》實施後，確實冇再公開呼籲外國制裁，但仍堅持佢有「隱性請求」或暗中鼓勵。李官提醒，表面言論未必反映全貌。彭耀鴻反問：「有人贊成一件事，係咪就等於提出請求？」佢強調，審訊必須根據無罪推定原則，黎只係評論國際新聞，仲小心措辭，根本無從推論佢參與串謀。

昨日，彭耀鴻提到控方指控嘅《蘋果》161篇文章，只係佔涉案期間總文章量約0.39%，不足證明有「串謀」意圖。今日佢再就此爭辯，杜麗冰法官一度打斷，認為單靠數字冇幫助，但最後都允許佢繼續延伸角度。

另外，控方又指黎喺7月23日轉發《蘋果》一篇有關新疆人權引發美國制裁嘅報道時，留言稱「防止侵犯人權最好方法，就係追究劣行者責任」。控方認為，呢評論等同支持美方制裁；辯方就堅持，呢啲只係時事評論，唔能夠解讀成制裁請求。

控辯雙方今日多次圍繞「請求」同「隱性請求」嘅界線交鋒。彭耀鴻最後重申，串謀唔只係「想做某件事」，仲要有具體協議同行動；而黎喺《國安法》實施後已經停止相關言論，正好顯示佢有意避免觸犯法例。

案件審訊明日繼續，辯方會再作陳詞。