最新報告披露，自從2020年房地產債務危機爆發以嚟，中國已有77間房企出現債務違約，累計違約金額超過人民幣1兆2千億元。當中得20間房企嘅債務重組或重整獲批，另有30間公司被迫下市。

報告指出，2021年有16間房企違約，去到2022年更急升至44間，成個行業受到沉重打擊。自2022年至今，已經有27間上市房企被動退市，包括大陸A股14間同香港市場13間，仲有啲公司選擇私有化退市。

重組方面，截至2025年8月，境內外債務重組完成嘅包括融創、富力、奧園、遠洋、時代中國同龍光；只完成境外重組嘅有中梁、當代；而境外重組獲批嘅則有旭輝、佳兆業、金輪天地、禹洲、世茂、綠地同碧桂園。今年6月，新華聯完成重整，霍煤龍興房地產、金科股份同協信遠創亦獲法院批准重整，現正執行中。

另外，多間公司因為轉型或者「保殼」，選擇剝離房地產開發業務，例如魯商發展、珠免集團、冠城新材，逐步退出傳統地產行業，改走輕資產模式。

但整體業績依然嚴峻。截至8月20日，滬深市場有71間上市房企公布2025年上半年業績預告，其中45間錄得虧損，佔比63.4%，比去年同期更高。有啲公司單季虧損甚至超過百億元。

報告分析，房企普遍虧損原因包括項目結算大幅下降、毛利率持續低迷、計提資產減值增加、部分資產同股權交易價格低過帳面值，加上有息負債利息費用上升，進一步加重財務壓力。