中國恒大集團同華南城控股先後爆出債務違約後，香港本地地產商亦開始陷入財務困境。有分析指出，明年到期嘅房地產債券規模將激增近70%，加上樓市銷售低迷同估值持續下跌，潛在違約潮唔單止係地產業問題，仲可能動搖香港金融體系穩定性。

上周四，香港老牌發展商路勁基建宣布暫停支付離岸債務利息，成為首間出現債券票息違約嘅香港上市發展商。同樣從事物業投資同發展業務嘅英皇國際，7月亦首次錄得貸款違約。兩宗事件幾乎為本港地產業潛在危機敲響序曲。《路透社》分析指，商業地產市況短期難以復甦，加上融資渠道收緊，意味更多發展商可能無法履行還款義務。

根據倫敦證券交易所集團數據，香港地產商債券到期規模將由今年42億美元，急升至明年71億美元，增幅近70%，巨大的還款壓力將進一步考驗業界財務韌性。房地產及相關產業約佔本地生產總值四分之一，一旦違約事件擴散，將嚴重拖累香港經濟前景。

標普全球評級分析師陳文德指出，由於銀行正收緊對小型發展商嘅貸款，未來一至兩年本港可能會有更多小型發展商違約，甚至「根本冇任何機會償還呢啲貸款」。陳文德又提到，辦公室同零售資產估值自2019年高峰以來已下跌超過50%，難以變賣套現，持有呢啲資產嘅發展商面臨巨大壓力。

喺財務狀況緊絀嘅發債人中，四大發展商之一新世界發展亦備受關注。新世界明年將有1.68億美元債券到期，至2027年又有6.3億美元債務到期，而總負債高達1,800億港元，外界普遍視為金融市場最大潛在風險之一。

金融機構對地產界嘅不穩定因素高度警惕。恒生銀行今年上半年為香港商業地產撥備高達25億港元，較去年同期急增224%；滙豐銀行「有重大信貸風險但尚未違約」嘅香港商業貸款規模，亦升至181億美元。部分市場觀察人士透露，部分銀行為免觸發骨牌效應，選擇暫時唔將部分貸款列為違約，也避免即時收回抵押資產，希望以時間換取市場復甦。仲量聯行香港主席曾煥平表示，若銀行削減對發展商嘅放貸，可能會拖累整體經濟活動。