美國國務院發表《2024年度人權報告》，指香港過去一年嘅人權狀況持續惡化，北京同港府合作打壓自治同政治自由，情況包括任意拘捕同長期還押、跨境追捕流亡港人、嚴厲限制言論同新聞自由、人口販運，以及壓制工會自主同勞工權益，仲批評港府幾乎毫無作為，令官員問責制度蕩然無存。

呢份長達22頁嘅香港專章，係美國總統特朗普今年1月重返白宮之後，國務院發表嘅第一份人權報告。報告指，港府持續引用《香港國安法》同2024年3月生效嘅《維護國家安全條例》（《基本法》第23條），去檢控和平表達政治意見嘅人士，並限制公眾自由批評政府。

《維護國家安全條例》將部分定義含糊嘅言論列為犯罪，仲將煽動罪最高刑期由兩年加到七年。28歲男子諸啟邦因為着住印有「光復香港 時代革命」字樣嘅T恤，喺去年9月被判監14個月，成為條例生效後首批定罪嘅人之一。去年5月，國安處拘捕前支聯會副主席鄒幸彤同佢母親等8人，指控佢哋籌辦六四燭光集會，呢單係條例實施後首批拘捕行動之一。

報告形容公民自由空間進一步收縮，國安教育成為各級學校嘅必修課，公立學校要限制校園內嘅政治表達同活動。公立圖書館、學校同大學為配合《國安法》自我審查館藏，部分同天安門事件有關嘅資料被列為「特藏」。去年7月，香港書展下架咗包括區家麟《最後的信仰》同邵家臻《字裡囚間》喺內嘅至少8本書。

新聞自由方面，香港記者協會去年8月嘅調查顯示，會員對新聞自由嘅評分淨係得25分，係連續第五年下跌。報告列出壹傳媒創辦人黎智英嘅《國安法》審訊、外國記者被拒入境，以及獨立媒體內容疑似被監控等事件，形容新聞界生存空間急劇收窄。

勞工權益亦受影響，港府利用《國安法》、《社團條例》同《職工會條例》打壓獨立工會。根據「香港勞權監察」嘅數據，2021年至2023年間一共有218間工會被迫解散或註銷登記，遠高於2018至2020年間嘅11宗。前職工會聯盟總幹事蒙兆達因為參與國際勞工運動而被通緝，顯示打壓延伸到境外。

任意拘捕同長期還押嘅情況普遍存在。自2020年起，喺《國安法》同煽動罪下被檢控嘅136人同5間公司中，有104人被拒絕保釋。報告仲點名黎智英、鄒幸彤同部分「47人案」被告長期單獨監禁，嚴重威脅佢哋嘅身心健康。

跨境打壓方面，2023至2024年間港府兩次發出通緝令，合共通緝19名流亡海外嘅民主人士，並懸紅每人100萬港元，取消羅冠聰、劉祖廸、鄭文傑等人嘅特區護照，禁止港人向佢哋提供資助或租屋。至少有4人因為訂閱相關網上平台而被捕。

對於報告內容，外交部駐港公署批評美方藉所謂人權報告抹黑香港，重申任何外國勢力嘅干預都係徒勞無功。