四川江油市一宗未成年少女被霸凌事件，最近引發民憤，仲演變成大規模群眾示威同警民衝突，成為全國焦點。事發之後，多名施暴者同佢哋家長已經向受害者道歉，官方就呼籲市民唔好再轉發相關影片，話係為咗保護受害人同家屬嘅私隱同情緒。

事件發生喺7月，江油公安話喺7月22日接報後展開調查，但一直到8月4日先對涉事人作出處置。官方聲稱，期間警方有傳召所有涉案人同在場人士做筆錄，並請法醫做傷勢鑑定，直到8月3日先確認受害者只係輕微受傷，之後再根據法律作出懲處。幾位施暴者中，有三人被送去專門學校接受矯正或者批評教育。

但外界對官方嘅處理方法及進展唔收貨，特別係其中一位施暴少女曾經自誇話：「我入過派出所十幾次，唔使廿分鐘就出嚟。」一句說話令網民群情洶湧，怒火加劇。官方就澄清話，呢句係誇張講法，只係嗰個女仔想嚇受害人。

去到8月4日，事態升溫，唔少市民因為不滿警方太輕手，聚集喺江油市政府門外示威，現場一度爆發激烈嘅警民對峙。有網上傳聞話警方用運豬車載走示威者，引起極大爭議。網民更將熱播電影《南京照相館》用作諷刺，創出「江油照相館」呢個新詞，用嚟揶揄江油公安嘅粗暴執法。

當日「江油」、「霸凌」等字眼即刻登上網絡熱搜榜，雖然相關影片同帖文大規模被刪，但唔少網民繼續瘋傳，仲有人打電話去江油公安局投訴，令到該局電話一度癱瘓。

去到第二日凌晨，警方展開大規模清場行動，並拘捕咗部分抗議者。到5日中午，市政府前面抗議現場已經清空，地面整潔，完全睇唔到抗爭痕跡。

面對愈來愈高漲嘅社會關注，綿陽市屬下官媒《涪江觀察》報道話，施暴者同佢哋家長已經正式道歉，受害人家屬都感謝市民關心，但希望事件可以告一段落，盡快回復正常生活。報道亦引述律師話，警方已經喺「最嚴格懲處範圍內」作出處理，似乎係想為官方嘅行動護航。