一個跨國虐貓網絡最近被揭發，成員來自世界各地，喺加密通訊平台上交換同販賣大量虐殺貓貓嘅片段。片入面包括電擊、溺斃、肢解、蓄意餓死等極度殘忍嘅手段。有動物保護團體指出，呢啲血腥片平均每14個鐘就有一段新片上載，甚至出現有小朋友參與虐待行為，情況令人震驚。

呢啲影片嘅源頭，被指同一個由中國人主導嘅網絡有關。事件喺今年5月於英國引起社會廣泛關注，當時倫敦賴斯里普有兩名17歲少年同一名16歲少女，被控喺公園虐殺兩隻小貓。現場搵到刀、噴火器同剪刀等工具，警方正調查佢哋有冇同呢個跨國虐貓網絡有關聯。‘

調查發現，呢啲虐貓片最早係由一名中國男子王朝溢喺2023年上載，內容血腥得嚟極之震撼，短時間內喺中國同西方社交平台瘋傳。其後，類似群組轉移到加密通訊平台繼續活動，當中有啲網站甚至偽裝成「愛貓社群」，要求新會員上載自己虐貓片段作為「入場券」。

有啲群組成員分佈全球，包括歐洲、亞洲同美國。調查又指，英國有成員曾建議其他人去皇家防止虐待動物協會領養貓，然後用嚟虐待，仲分享購買小貓嘅廣告，留言話「想狠狠咁對待佢哋」。

動物保護組織「貓咪守護者」指出，由2023年5月到2024年5月之間，平均每14個鐘就會有一條新嘅虐貓片上載。目前全球至少有24個類似活躍嘅群組，而最大嗰個群組有超過1,000名成員。入面最活躍嘅施虐者據報已經殺害超過200隻貓。

該組織義工Lara話，有啲群組為咗升級入更高層級，會要求新會員肢解貓咪作為「條件」，甚至故意延長貓貓嘅痛苦，例如貓暈咗之後用電擊電醒佢再繼續虐待。佢又透露，曾有成員發起所謂嘅「百貓虐殺賽」，比賽邊個可以最快殺死100隻貓。

「貓咪守護者」曾有義工成功潛入其中一個群組，發現有名為「小習維尼」嘅用戶極有可能係主腦。佢個頭像係小熊維尼，疑似影射中國國家主席習近平。經多番接觸，該義工成功引導對方進行視像通話，最終發現佢係一名喺日本東京居住、27歲嘅中國男子。

Lara形容，呢班人根本無下限，個網絡邪惡得令人髮指。佢指出，中國至今無正式動物保護法，變相令呢啲殘忍片段得以瘋狂流傳，甚至有自稱得10歲嘅細路都可以睇到。佢呼籲各國政府要正視呢件事，否則情況只會愈來愈嚴重。