英國國會下議院最近正式決定，全面停止向議員辦公室派發中共官方英文喉舌《中國日報》，顯示北京長年透過宣傳品滲透西方民主核心機構嘅做法再次遭受挫敗。今次行動緊接美國國會喺今年3月作出類似決定，突顯西方國家對中共大外宣策略愈來愈反感，亦加強咗防範。

保守黨國會議員凱恩斯（Alicia Kearns）喺下議院提出質詢，推動咗議會去審視呢件事。得知決定後，佢即喺社交平台X發文話：「中國共產黨再唔可以向我哋議員派宣傳材料啦」，仲批評《中國日報》係中共用嚟掩飾人權侵犯紀錄同散播全球威脅嘅工具，「根本唔應該喺我哋嘅國會出現」。

凱恩斯直言，中共試圖利用由英國納稅人資助嘅民主制度平台去發放自己嘅訊息，「呢種行為係完全錯誤」，又話假借新聞名義嘅滲透行為已經持續多年，終於可以劃上句號。

一直關注人權議題、同時係英國保守黨人權委員會副主席同香港監察（Hong Kong Watch）創辦人嘅羅傑斯（Benedict Rogers）亦轉發凱恩斯貼文，感謝佢成功阻止「中共嘅謊言同宣傳喺英國民主中心擴散」。

據了解，從2016年開始，《中國日報》已經以大量郵件形式送到下議院郵件中心，信封仲標明係畀「全體議員」收嘅。不過，下議院行政部門從來都無申請過該報紙，亦無授權將佢分派比議員。雖然設有電郵機制可以退訂，但實際上根本無法阻止報紙繼續湧入。

呢個情況引起唔少議員不滿。下議院行政委員會主席、工黨議員史密斯（Nick Smith）早前已經下令檢討大量郵件政策，並要求查清楚報刊嘅資金來源同發行程序。最終議會拍板，唔再向任何議員辦公室派發呢份報紙。

《中國日報》英文版一向都係中共官方外宣嘅主要平台之一，曾經喺美國國會派發咗長達42年。早喺2020年，美國時任國務卿蓬佩奧已經將《中國日報》同其他4間中共媒體列為「外國使團」，之後名單再擴展至另外11間官媒，目標就係阻止北京用媒體搞滲透。

而喺今年3月，美國眾議院正式禁止《中國日報》進入國會山莊，並指示所有新聞代理唔可以再派報去議員辦公室。《紐約時報》、《華盛頓郵報》等主流媒體亦早已唔再刊登《中國日報》嘅廣告同內容。

隨住英美兩國國會先後封殺《中國日報》，中共喉舌喺西方核心政治圈內嘅活動空間進一步收窄，顯示北京喺外宣戰線上面臨更大阻力。